ZALEN October 27, 2024 : Kumthar January atangin Aizawl khawpui bawlhhlawh chu chi thum - tawih thei (wet waste), tawih thei lo (dry waste) leh tawih thei lo dang (sanitary & domestic hazardous waste)-ah te thliar hran tum a ni.

Urban Development & Poverty Alleviation (UD&PA), Aizawl Municipal Corporation (AMC) leh Aizawl Smart City Ltd. ten ruahmanna an siam dan chuan tawih thei lo hi bawlhhlawh bawm pawlah paih tur a ni ang a, tawih thei chu a hring leh sanitary & domestic hazardous waste chu bawlhhlawh bawm senah te paih tur a ni.

In sakna hmanrua leh electronic waste chu vantlang bawlhhlawh paih motor-ah paih lovin mahnia paih a ngai dawn a ni.

Tun dinhmunah Aizawl khawpui bawlhhlawh khawn khawm hi chawhrualin ni tin tawih thei to ton 89 leh tawih thei ton 30 vel a ni a, hengte hi Tuirial-a solid waste management centre-ah paih an niin heta tang hian leitha siam a nih bakah bawlhhlawh tawih thei lo atangin thla khatah hralh chhawn theih quintal 2,000 aia tam lak chhuah thin a ni.

Bawlhhlawh sawngbawlna hmun nei tur hian UD&PA, AMC leh Aizawl Smart City Ltd. te chuan hma an la mek a, tawih thei lo paihna leh sawngbawlna, ni khata ton 75 sawngbawlna hi Luangmual-ah siam mek a ni a. Tawih thei sawngbawlna hi Tuiriala solid waste management centre-ah chhunzawmin damdawi lam thil, hmanraw hlauhawm leh e-waste paihna tur pawh buaipui mek a ni a. In sakna leh thiahna bungraw hlui leh chhia paihna tur hi Hualngohmun-ah siam mek a ni bawk. 

Bawlhhlawh thliardan ruahmanna thar nakum January atanga hman tan tur chungchang inhrilhfiahna hi October 21 & 22, 2024 khan UD&PA, AMC leh Aizawl Smart City Ltd. chuan Aizawl veng hrang hrangah an nei a. Ruahman dan chuan December 15, 2025 hmain in tinah lutin bawlhhlawh thliar dan inzirtirna hi neih tur a ni.

DRY WASTE (TAWIH THEI LO) Bin Colour : Blue (A Pawl)

1. Lehkha leh lehkha hmanga thilsiam te

2. Savun hmanga thilsiam te leh rexine chi zawng zawng

3. Thir lam chi zawng zawng

4. Ei tur leh in tur siamsa funna bur leh can te

5. Meizial bung leh a bawm

6. Sam leh ran hmul

7. Tyre chhia

8. Rubber, kutkawr, polythene leh plastic lam chi

9. Disposable plate & cups

10. Carpet chhia

11. Satha ip lam chi te

12. Puan leh thawmhnaw chhia

13. Kuhva leh coconut kawr

14. Styrofoam, thermocol etc.

WET WASTE(TAWIH THEI) Bin Colour : Green (A Hring)

1. Choka ningnawi

2. Chaw/Chawhmeh eina leh a siamna ningnawi

3. Thei leh a pil

4. Thlai rah leh hnah leh a kuang

5. Mautuai leh rawtuai khehna

6. Hnahthel (a tang tel loin)

7. Chakai leh chengkawl kawr leh saruh lian te

SANITARY & DOMESTIC HAZARDOUS WASTE Bin Colour : Red (A Sen)

1. Sanitary pads leh diaper

2. Darthlalang, sawidawium leh bulb te

3. Battery

4. Thosi hlo leh insecticide lam chi leh a dahna bur te

5. Oil, aerosol,paint etc.