Aizawl: Mizoram ah chawhrualin kumtin 0.04 degree celcius in khua a lum hret hret a, hetih lai hian ruahtui tla erawh 5.2 in a tlem chho hret hret thung.

Directorate of Science & Technology chhinchhiahna atanga a lan danin khua hi kumtin a lum chho hret hret a, kum 1986 atanga chhinchhiahna an kalpui ah chawhrualin kumtin khua a lum chho zel. Nikum 2019 chhung khan Mizorama khaw lum ber ni chu April ni 26,2019 a ni a, hemi ni a khaw lum lam hi 38.4 degree celcius a ni a, hei hi kum 34 chhunga Mizoram lum ni ber record a ni bawk. Nikum chhung vek khan khaw vawh ni ber chu January ni 3,2019 a ni a, hemi ni a khaw vawh lam hi 11.4 degree celcius a ni.

Kum 34 kalta chhunga Mizoram khaw vawh ber ni chu January ni 13,2017 kha niin hemi ni a khaw vawh lam chu 2.7 degree a ni.

Zalen zawhna chhangin Science & Technology department thawktu te chuan kumtina khua a lum chhoh zel chhan chu green house effect vanga boruak chhia a tam vang te, thingtlang atanga khawpuia lut an tam vang leh ramngaw tih chereu tam vang te nia an hriat thu an sawi a. Khawlum lutuk tur tihzia-awm nan ramngaw neih that a pawimawh tih sawiin thingphun uar aiin a awmsa venhim chu a pawi-mawh zawk niin an sawi.

Ruahtui chung changah Mizoram ruahtui dawn chu chawhrualin kumtin 5.2mm velin a tlahniam hret hret niin an sawi a, ruahtui tlak tlem chhan tak hi sawithiam a har niin Zalen palai an hrilh.

Science & Technology department-in kum 1986 atanga chhinchhiahna an lo kalpui tawhah chawhrualin kumtin ruahtui 2500 mm vel a tla thin a, nikum 2019-ah chuan Mizoram in ruahtui a dawn hi 1516mm chauh niin an sawi. Nikum chhung khan July thla ah ruahtui tla tam berin hemi thla hian 400.4 mm a tla a, ni khata a tlak tam ber tum chu April ni 9 niin hemi ni hian 77.3mm a tla a ni.

Mizoram district pariat zingah Aizawl, Champhai, Kolasib, Lawngtlai leh Serchhip district ah te ruahtui tla a tlem zawk laiin Lunglei, Mamit leh Siaha district-ah chuan kumdang aiin nikumah ruah tui tla hi a tam zawk thung.

• Kum 34 kalta chhunga Mizoram lum ni ber chu April ni 26,2019 a ni a, a lum lam chu 38.4 degree celcius a ni. Kum 34 chhung veka Mizoram vawh ber chu January ni 13,2017 niin a vawh lam chu 2.7 degree celcius a ni.
• Kum 34 kalta chhunga ruahsur tam ber thla chu June 2017 niin hemi thla hian 743.5mm a tla. Mizoram vawh ber chu January ni 13,2017 niin a vawh lam chu 2.7 degree celcius a ni bawk ni.
• Kum tina Mizoram ruahtui dawn chawhrual chu 2500 mm a ni.
• District dangah ruahtui a tla tlem a, Lunglei, Mamit leh Siaha district ah chuan kumdang aiin nikumah ruahtui tla hi a tam zawk thung.