August 26, 2022; Mizoram ah kumin January atanga August ni 24 thleng khan heroin vanga thi mi 23 an awm tawh a, hetihlai hian tunkar chhung ringawt a Mizoram police ten heroin an man hlutna chu International market rate a chhutin Rs. vbc 16.91 man hu a tling.

Excise & Narcotics department (END) chhinchhiah danin, kumin a heroin vanga thi te hi mipa 22 leh hmeichhia 1 an ni a, nikum 2021 chhung khan mi 47 awmin, mipa 39 leh hmeichhia 8 an ni. 

Police thuchhuah a tarlan a nih danin, tunkar chhungin Mizoram hmun hrang hrangah heroin man a ni a, chungah chuan a neitu a puh te man tel zel an ni. Tunkar chhung a heroin man te hi international market rate a chhutin Rs. vbc. 16.91 man hu a tling a, tunkar chhung ringawt a man hi kg 3 dawn a tling.

August ni 22 zan a CID/SB ten Kanan veng Kawnpui, Kolasib distrct a lirthei pakhat atanga heroin an man, hawng 200/kg 2.7 vel, international market a Rs. vbc. 13.4 man vel chu tunhnai a Mizoram a ruihhlo man ah a tam tham berte zinga pakhat a tling. Heng ruihhlo neitu a puh mi pahnih te man niin, Special Narcotics Police Station, Aizawl-ah thubuai ziahluh a ni.