Aizawl: Kumin January - October chhungin Aizawlah ruahtui mm 1,994.8 a tla tawh a. Hei hi nikum kumtluana ruahtui tla aiin mm 76.4-in a tam zawk a. Hetihlai hian kumina Aizawl lum ber ni chu April 28 niin 32°C a tling.

State Meteorological Centre, Directorate of Science & Technology-in a chhinchhiah danin kumin chhung a ruahtui tlak tam ber ni chu July 22 niin, mm 65.0 a tla a, a tlak tam ber thla pawh July niin mm 460.2 a tla. 

Kumin thla 10 chhunga ruahtui tla zat, mm 1,994.8 hi nikum chhunga tla zat, mm 1,917.6 aiin a tam hret a. Nikuma ruahtui tlak tam ber thla chu July niin mm 360.3 a tla a, a tlak tam ber ni chu July 13 niin mm 49.0 a tla.

State Meteorological Centre, Directorate of Science & Technology-in a chhinchhiah dan chuan kum 36 chhung (1986 atanga 2021) khan fur (June -September) laiin kum tin ruah mm 1,289.9 sur ang a ni a. Kum 2017 kha fur chhung bika ruah tlak tam ber kum niin 
mm 1,836.0 a tla a, 2020 kha a tlak tlem ber kum niin mm 856.4 a tla.

Kumin fur (June-September) chhung a ruahtui tla zat chu mm 1,288.3 a tling.

Kumina Aizawl lum ber thla chu April niin, chawhrualin 27.9°C a ni a; a lum ber ni, April 28-ah 32°C  a ni.

Hetihlai hian kumina Aizawl vawh ni ber chu January 29 niin 8°C a ni a. Kumin a khaw vawh ber thla, January vawh lam chu chawhrualin 16°C a ni.

Aizawl ruah tlak dan (mm)
Thla                 2021    2022
January           3.0       23.9
February          0.5       17.2
March              61.0      53.3
April                85.5      73.2
May                164.2     327.8
June                336.11   355.3
July                 360.3     460.2
August            353.5     277.8
September      249.3     195.0
October          155.2      211.1
November      72.0    -
December      77.0    -
TOTAL           1917.6     1994.8