Aizawl: Aizawl Municipal Corporation (AMC) a Councillor thlanna chu kuminah neih theih a ni dawn lo a, inthlan hun tur pawh a la hriat loh. AMC inthlan lo awm turah polling station 48 siam belh a ni dawn a, Local Council inthlana polling station 226 awm chu AMC inthlanah 48 siam belhin 274 a awm tawh dawn a ni.

Zalen-in State Election Commission hotute a kawmnaah hripui Covid-19 leng mek ngaih-chan a ngaih avangin kuminah chuan AMC inthlan hi neih a ni dawn lo tih an sawi a. SEC Secretary Teresy Vanlalhruaii chuan, “Tun dinhmunah inthlan buatsaih ngamna chi-ah kan ngai lo va, inthlan hun tur chu boruak awm dan azirin la ngaihtuah leh a ni ang,” a ti.

AMC awm zel dan tur chungchangah SEC Secretary chuan AMC term chu tawp mah se, sawrkarin an aiawha roreltu tur a ruat thei niin a sawi. Tuna AMC term ding mek hi tunkar Ningani (December 10, 2020) hian a tawp dawn.

Tun lai hri leng avangin State Election Commission chuan mipui himna ngaihtuah chungin AMC-a polling station pakhatah voter 1000 hnuai lam awmtir vek turin ruahmanna a siam a, polling station-a vote awm tam zualnate chu polling station dangah sem rual a tum a ni. SEC-in ruahmanna a siam dan chuan hri leng avanga AMC roll hearing neih tur pawh kum danga punkhawm ang kha a rem dawn loh avangin AMERO-te a hmunah kalin koh tula an hriatte chauh an ko dawn.

AMC roll-a inthun thar duh tan ni 05.12.2020 thleng Electoral Roll atanga hming paih, thun thar, siamthat ngai leh insawn duhte tan dilna (claims and objections) Local Level Officer hnenah thehluh theih a ni dawn a, ni 07.12.2020 - 12.12.2020 chhungin MERO/AMERO ten an endik ang. AMC roll ah hian ni 1.1.2020-a kum 18 tling chinte chu thun theih an ni ang.