Aizawl: Kumin chhungin Mizoramah damdawi hmansual vanga thi mi 53 an awm tawh a. Sawrkarin inkharkhip a thlahdul deuh avangin heroin man pawh a tlawm leh deuh tawh nia thudawn a ni.

Excise & Narcotics Department chhinchhiah danin damdawi hmansual vanga thi zinga 49 hi mipa niin hmeichhia 4 an awm bawk a. Drugs vanga thi hi January thlaah mipa 5 leh hmeichhe 2, February thlaah mipa 5 leh hmeichhe 1, March-ah mipa 2, April-ah mipa 5, May-ah mipa 5, June-ah mipa 6, July-ah mipa 8, August-ah mipa 5 leh hmeichhe 1 leh September thlaah mipa 8 te an ni. Damdawi hmangsualte thihpui tam ber hi heroin leh thil dang tihpawlh a ni.

Excise & Narcotics chhinchhiah danin kum 1984 atanga October ni 1, 2020 thleng khan damdawi hmansual vang hian mi 1,632 an thi tawh a, heng zinga 1,441 hi mipa niin hmeichhia 191 an awm bawk. Chhinchhiahna atanga a lan danin drugs ti thinten an thihpui tam ber chu proxyvon /parvon spas a ni a, hemi avanga thi hi 1,161 an awm tawh a. Heroin vanga thi 213 leh thil dang dang tihpawlh vanga thi 258 an awm bawk.

Zalen zawhna chhangin Excise & Narcotics Department thawktute chuan lockdown thlahdul hnuah drugs hmuh tur a tam thar leh niin an sawi a. Ruihhlo hi a tlangpuiin khawchhak lam atangin a lo lut nia sawiin Bagha lam atang chuan a lo lut meuh lo nia an hriat thu an sawi a. Ruihhlo man pawh tlemin a tlahniam nia sawiin a hmaa hawng khat Rs. 70,000/60,000 vel ni thin chu Rs. 50,000 te pawhin hmuh tur a awm tih an sawi a. Drugs ti thinte pawh ni dang ai chuan an zalen thar leh deuh nia an hriat thu an sawi bawk.