Aizawl: Kumin January atanga October (thla 10) chhungin Aizawlah dan bawhchhia lirthei 15,483 man an ni tawh a, an pawisa chawi tling khawm chu Rs. 58,70,900 a tling. Dan bawhchhia man zingah two wheeler a tam ber.

Aizawl Traffic police chhinchhiah danin, September 2022 atanga Motor Vehicles (Amendment) Act 2019 hman a nih atangin dan bawhchhiate pawisa chawi a pung a, dan hman thar a nih September, 2022 ah dan bawhchhia lirthei 1,789 man niin, an pawisa chawi tling khawm pawh Rs. 12,75,500 a tling.

October, 2022 ah traffic dan bawhchhia mi 871 man awmin, an pawisa chawi tlingkhawm Rs. 5,35,800 a ni a. Dan bawhchhia man zingah phal lohna hmuna lirthei dah (207) chu tam berin, lirthei man zingah two wheeler (619) an man tam ber bawk.

Kumin thla 10 chhung a dan bawhchhia an man zingah two wheeler tam berin, hemi chhung a dan bawhchhia two wheeler an man zawng zawng chu 10,728 a tling.

Mizoram police chuan thuchhuah siamin, traffic dan thar chu khauh tak a kenkawh zel a ni dawn tih an tarlang a, lirthei neitu zawng zawng leh khalhtu zawng zawng te chu thuawih taka traffic dan zawm turin an ngen.