Aizawl: Natna chi khat, dengue vei thar chu an tlahniam zel a, nakum furah a pung leh dawn  a. Dengue vang hian kumin chhungah mi pangain nunna an chân tawh.

ZALEN-in health department thawktute hnen atanga thu a dawn danin fur a reh chhoh tan avangin dengue natna pawhin ziaawm lam a pan chho zel a; mahse, hetih lai hian vei thar an la awm reng thung a, vei/kai thar hi a ziaawm chho zel turah an beisei tih an sawi.

Health department thawktute chuan thal a nih chhoh tan avanga thosi tui theihna hmun a tlem avangin dengue chu ziaawm tan a ni tih sawiin nakum fur ah a pung leh dawn niin an sawi bawk.

Health department chhinchhiah danin kumin chhung ringawt hian Mizoramah dengue kai 1,397 hmuhchhuah a ni a, heng zinga a tam ber 91.76% hi Aizawla hmuhchhuah a ni tih an sawi a. Elisa test chauh he hri kai hmuh nan hian pawm a nih avangin hri kai hi hei aia tam an awm thei niin an sawi bawk.

Dengue natna avang hian kum dangah thi an awm hriat a ni lo a, kuminah erawh chuan he natna thihpui mi panga an awm tawh thung a. Dengue thihpui hi Aizawl khawpui chhunga mi vek an ni.  Kumin January atanga November thla tawp thleng khan Mizoramah dengue natna vei nia rinhlelh thisen 4,155 test a ni tawh a, heng zinga 1,397 hian hri an vei tih finfiah a ni.

DENGUE : Dengue hi natna chi khat virus in a thlen a ni a. He natna hrik (virus) hi thosi in a pu darh thin a, chuvangin thosi seh atanga inkaichhawn theih a ni. Dengue natna thehdarhtu thosi hi thosi chi khat Aedes aegypti (a dum leh a var tial rik rek), Mizoten thosi rang kan tih hi a ni. Aedes thosi te hian vawi khat Dengue hrik a pai tawh chuan a damchhungin a pai reng a, a seh apiang ten Dengue natna an kai thin. Malaria thlentu thosi te anglo takin Aedes thosi te hian chhun khaw en laiin mi an seh deuh ber thin. Dengue hi chi hnih a then niin, chungte chu Dengue Fever leh Dengue Haemorrhagic Fever te an ni. Aedes thosi in mihring a seh atanga ni 5 – 6 chhungin natna a langchhuak thin.