Aizawl May 19, 2024 : Mizoramah kumin chhungin khawsik natna chi khat, dengue vei mi 132 hmuh a ni tawh a, hetih lai hian dengue vanga thi erawh an la awm lo thung.

National Vector Borne Disease Control Programme (NVBDCP) huaihawtin Ningani kalta khan Aizawl khawpui chhunga local council aiawhte tan ATI Auditorium-ah dengue natna chungchang zirhona buatsaih a ni a. He huan thusawitu health department mi thiamte chuan dengue natna chu khawvel ram 129-ah hmuh a ni tawh tih sawiin kum tin a vei hi khawvelah tluklehdingawn 3.9 an awm tih an sawi.

Mizoramah chuan kum kum 2018 atang khan dengue natna hi hmuh tan niin hri kai hi 2018-ah 68, 2019-ah 131, 2020-ah 67, 2021-ah 83, 2022-ah 1,868 leh nikum 2023-ah 2,060 hmuh a ni tih an sawi a. He natna thihpui hi 2022-ah mi panga leh 2023-ah pahnih an awm tih an sawi.

Kuminah pawh hian dengue natna thlentu thosi pian theihna tui tling tihbo a nih loh chuan kum hmasa lam ai hian dengue natna vei hi an pung thei niin an sawi.

Health department mi thiamte chuan dengue chu khawpuiah a hluar nia sawiin kumina hri kai an hmuh 132 zinga 101 chu Aizawla hmuh a nih thu sawiin tui tling awm tamna hmunah he natna hi a hluar zel niin an sawi bawk.