Aizawl: Kumin January atanga December ni 17,2020 thleng khan Mizoramah damdawi hman sual vanga thi (drugs related death) mi 63 an awm tawh.

Excise & Narcotics Department chhinchhiahna atanga a lan danin kumin chhunga Mizoram-a damdawi hman sual vanga thi mi 63 zinga 57 hi mipa niin a dang 6 te hi hmeichhia an ni thung. Thi zinga 7 hi heroin hmang te an ni a, a dang hi heroin leh ruihtheihthil an hmuh ang ang tihpawlh te an ni.

Excise & Narcotics chhinchhiah danin kum 1984 atanga December 17, 2020 thleng khan damdawi hman sual vang hian Mizoram-ah mi 1,642 an thi tawh a, heng zinga 1,449 hi mipa niin hmeichhia 193 an awm bawk. Chhinchhiahna atanga a lan danin drugs ti thinten an thihpui tam ber chu Proxyvon /Parvon Spas a ni a, hemi avanga thi hi 1,161 an awm tawh a. Heroin vanga thi 213 leh thil dang dang tihpawlh vanga thi 268 an awm bawk.