ZALEN February 9, 2025 : Excise & Narcotics department (END) chhinchhiah danin, nikum 2024 chhung khan Mizoramah ruihhlo vangin mi 67 an thi a, hetihlai hian kumin 2025 chhungin ruihhlo vanga thi an la awm lo.

END chhinchhiah danin, kum 2024 chhunga ruihhlo vanga thi mi 67-te chu mipa 58 leh hmeichhia pakua an ni a, kum 21 leh 57 inkar an ni. Mi 67 zinga 39 chu heroin ti ?hin an ni a, mi 28 chu ruihhlo dang ti an ni thung.

Kum 1984 atanga 2024 thlenga Mizorama ruihhlo vanga thi END-in mi 1,879 an chhinchhiah a, chung zinga 1,653 (87.97%) chu mipa niin, 226 (12.03%) hmeichhia an ni. Kum 2023 chhung khan ruihhlo vangin mi 76 (mipa 64 leh hmeichhia 12) an thi a, kum 2004 hnua ruihhlo vanga thi tam ber kum a ni.

Mizorama ruihhlo vanga thi tam lai chu kum 1998-2004 inkar a ni a, hemi kum 7 chhung hian kum tin mi 80 aia tlem lo an thi a, kum 7 chhunga ruihhlo vanga thi belhkhawm chu mi 785 niin, chawhrualin kum tin mi 122 zel thi an awm ang a tling.

Hetih hun laia an thihpui tam ber ruihhlo chu proxyvon/pasvon spas a ni. Ruihhlo vanga thi tam ber kum 2004 khan mi 143 an thi a, mipa 122 leh hmeichhia 21 an ni.

Hetihlai hian END chuan kum 2024 chhung khan rakzu litre 67,911.515 leh sapzu um chi hrang hrang 34,704 an man a; heroin kg. 46.566 an man bawk. END tarlan danin, Excise enforcement-te chuan kum 2024 chhung khan rakzu lt. 67,911.515 an man bakah, zu bilh lai tin 1,26,337, zu siamna bungbêl 2,933 leh dawidim (yeast) kg. 181.577 an man a; Myanmar zu (BEDC) lt. 4,119.840 an man.