September 12; 2022; Charles III chu inrinni, September ni 10 khan St. Jame's Palace a inkhawm buatsaihah Kumpinu ram lal thar atan puan a ni a, he hun pawimawh tak 'King Charles III Proclamation Ceremony' a Royal Salute petu mi 41 zingah '7th Company Coldstream Guards Regiment' a awm, Mizo tlangval Benjamin Lalhlenpuia s/o Lalhlua (L), Melthum 3 a tel.

ZALEN thudawn danin, British Army ah 'Guards Regiment' panga awmin, chung zinga Coldstream Guards a tang mek, Benjamin Lalhlenpuia hian Commonwealth te tana British Army dilna hun hawn a nih laiin, online in a dil a, a dil atanga kum 2 na velah interview tura kohna a dawng.

A luh tumna tak zawk chu Royal Engineer lam a ni a, amaherawhchu visitor visa a kal a nih avangin engineer lamah a kal thei ta lo a, chumi vang chuan Guard Regiment ah a interview ta zawk a, a vawi khat interview na ah a beng lamah harsatna a neih vangin a tling zo lo a, Mizoramah rawn hawin, theihtawp a a inenkawl hnuah, nikum 2021, March thla khan interview turin England a pan leh a, chumi hnu nikum September atang khan British Army, Coldstream Guards a zawm a, thla 8 chhung training hautak tak a zawh hnu reilote ah, Charles III lal atana lakluh inkhawm pawimawh tak a Royal Salute petu tlemte zingah a tel a ni.

Hemi chungchangah hian Benjamin Lalhnehpuia chuan, a hun tawn chu mite aia a that bik vang a ni lo tih ZALEN hrilhin, a hun tawnin a zir em vang leh a vanneih vang zawk a ni tih a sawi. "Keini Guardsmen tan chuan ka hun tawn hi a chhinchhiah tlak khawp mai, Buckingham Palace a Kings Guards ti hmasa berah khan ka tang ve a, vawiin (12.9.2022) ah Kings Guards Dismount Ceremony ah ka tel leh a, Irish Guards hoin min rawn thlak a, ka tan chuan thil chhinchhiah tlak a ni ve," a ti bawk.  

Benjamin Lalhlenpuia hi Lalhhlua (L) leh Vanlalchhuangi te fapa niin, Melthum 3 ah a nupui Janet Zothantluangi leh a fate 2 nen a khawsa an ni. Lal chhungkaw venghim hnathawktu ah Mizo tlangval Hruaisanga (Irish Guards) a lo awm tawh a, Benjamina hi a pahnihna nia hriat a ni. Benjamina te Regiment hi lal chhungkaw chenna Buckingham Palace huamchhung 'Wellington Barrack' ah awm mekin, lal chhungkaw venhim hnathawktu an ni.