September 11, 2023; Aizawl traffic police te chuan kumtlinglo lirthei khalh te lakah khauh takin dan an lekkawh mek.

Traffic hotute chuan hemi chungchangah hian thu an chhuah fo tawh tih ZALEN an hrilh a, field duty ten kumtling lo/underage driving hi chu engtik lai pawha endik reng tur a instruction awm sa a ni tih an sawi.

Mipui lam nena tan ho a ngai khawp niin an sawi a, a tul anga bawhzui a nih theih nan leh tih rem a nih theih nan an thlalak te pawh Traffic Police whatsapp number 93665 53559 ah te thawn zel turin an ngen.

Tunhnai khan Traffic SP chuan thuchhuah siamin, kum tlinglo (kum 18 tlinglo) lirthei khalh leh khalh tir tute hremna a na tih tarlangin, dan angin khauh taka hmalak a ni dawn tih a lo tarlang tawh. Traffic SP thuchhuah a tarlan a nih danin, kumtlinglo enkawltute leh lirthei khalh tir tute chu Rs. 25,000 chawi tir leh kum 3 thleng jail tan tir theih an ni a. Kum tlinglo lirthei khalhtu pawh kum 25 a tlin thleng learner leh driving licence a neih phal a ni lo.

Lirthei a hman pawh thla 12 thleng registration cancel theih a ni. Traffic SP chuan kum tlinglo lirthei khalh chu a khalhtu leh midangte tan pawi nasa tak thlen thei a ni tih tarlang bawkin, chung ang mite chu traffic police ah hriattir zel turin a ngen.