Kum tinin India hnampa Mahatma gandhi piancham chawlhkar chu ‘Faina Hapta’ atan hman thin a ni a, hetia faina hapta a hman thin anih chhan hi Mahatma Gandhi kha fai ngainatu anih vang niin an sawi. Khawvel ramdangte hmuhah chuan India chu ram bal leh tawp a la ni a, sawrkar leh mithahnemngai ten nasa takin tanla thin mahse hmasawnna tur erawh a la tam hle mai. Mizoram ah pawh sawrkar, tlawmngai pawl leh mi thahnemngai ten nsa takin tan an la a, an hnathawh chu hmuh theihin a awm a, hmasawnna nasa tak a awm chungin hmasawnna tur kan la ngah hle mai. Tunhnai maiah pawh AMC chuan Aizawl khawpui veng fai leh school fai te an thlang a, a endiktute ten report an pekna ah pawh hmasawnna nasa tak a awm thu an sawi chungin nasa lehzual a tanlak a ngaih thu an sawi tel a ni. Veng fai bikah hian kum hmasa lama fai thin te bawk kha veng fai an ni leh a, mipui nawlpuiah hmasawnna awm bawk mahse hei hian a entir chu fai kawngah hma kan sawn nep hle tihna a ni. Veng fai lawmman dawngtute hi an lawmpuiawm rualin veng dang ten nasa lehzual a tan an lak a, lawmman dawng thei ve ngei tura hnathawh a pawimawh a ni. A fai ngai leh lawmman la thin te bawkin kumdangah pawh lawmman an lak leh chuan hma kan sawnlo tihna mai ni lovin kan hnungtawlh a tih theih hial ang. Tunhnaia mipui ten fai pawimawhna kan hre zual deuh deuh a, khawpui lam aiin thingtlang lamin tan an la zual em ni aw a tih theih a, chuvangin khawpui ber Aizawl hian hmalakna tur a la ngah hle a ni tih hriatthar a tha hle mai. Bawlhhlawh hi amah maia awm ni lovin a tibaltu leh a siamtu chu mihringte hi kan ni. Chuvangin kan tihbalh miau loh chuan kan fai dawn tihna a ni. Kan khawpui a bawlhhlawh tam ber te hi meibung, kuhva eina, sarang chhia (polythene) an ni tlangpui a. Khawlai tihfai pawhin meibung chhar tur a tam bakah kuhva eina pahnah paih bakah khawlaia kuhva eina chhak sen tak tak hmuh tur a tam hle a, chumai ni lovin kuhva funna sarang chhia a tam em em bawk. hei hian chiang taka a lantir chu zuk leh hmuam ti thinte hi an tawp hle a, bawlhhlawh paih kawngah pawh an inthlahdah hle tihna a ni. Zuk leh hmuam ah ringawt pawh hian insum ila chuan kan khawpui hi a fai sawt dawn a ni. Faina hapta hi kan la hmang zel dawn niin a lang a, tuna kan kalphung pangngai anga tawngka a fai pawimawhzia inhrilh leh ngawt ang te, hapta neih chhunga mahni in leh a vel tihfai ringawt te hi a tawk lo hle a. Chuvangin faina hapta chhung chauha fai lovin kumtluana fai tura kan inzirtir leh kan nunpui a pawimawh. Kan tu leh fate pawh fai pawimawhzia te, hriselna anih dan te kan hrilhhriat tam a pawimawh hle. Mihring in natna kan vei tam zawk hi kan fai tawkloh avanga kan neih a ni tih hriain fai kan nunpui a, mi dangte kan zirtir chhawn zel hi kan mawhphurhna a ni tih mi tinten i hre thar leh ang u.