Aizawl: Tourism Minister Robert Romawia Royte chuan, “Hnam hrang hrangin kût kan hman thin hi zofate tipumkhattu a ni,” a ti.

Nimin Bawngkawn YMA hall-a Khuado Kut a hmanpuina ah he thu hi sawiin Tourism Minister chuan, “Zo hnahthlak hnam peng hrang hrangte chu tawng hrang nei ni mah se hei hian inpumkhatna leh zofa nihna a tihrang tur a ni lo,” a ti a. Zo hnahthlak hnam peng hrang hrangin tawng inthiampui tawn loh avangin unau an nihna a bo phah lova hei hian Zofate nih na tifamkimtu leh tiropuitu a ni a ti a, inlakhran duh zawnga rilru pu lova inhmangaihtawn a, induhsak tawn tur leh hnam tin chin dan thate inentawnsak a pawimawh tih a sawi bawk.

Robert Romawia Royte chuan Zofa hnam hrang te chu hnam dang te chimral theih leka tlem an la nih avangin fa neih tam kawngah tan lak a tul tih a sawi a, Zo hnahthlak hnam hrang hrang Society a ropui zel nan zirna kawngah tan lak a ngai tih sawiin zu leh ruihhlo leh HIV/Aids avanga Mizoramin harsatna tawh mek laka tal chhuak turin zofa te tanrual a tul hle a ni, a ti bawk.

Khuado Kut ah hian Zomi hnam lam chi hrang hrang entir a nih bakah mal zai te ngaihthlak a ni a, MZP President L. Ramdinliana Renthlei pawhin thu a sawi a ni.