ZALEN February 28, 2025 : Mizo Hnam Run chhung inkhawm chu vawiin khan neih leh a ni a. He huna thusawitu MNF GS VL. Krosshnehzova chuan, Sawhthing lei chungchangah kuthnathawktute dem lo hian, an zak anih chuan a changtu minister leh board chairman te hi bang ngam rawh se, a ti.

MNF GS chuan, "Tunlaia sawrkarin sawhthing a lei chungchangah, rim leh hah taka kuthna thawktuten dem an hlawh mai hi a makin a pawi hle mai. Rim taka thawktute avanga leitur nei thei mai zawk an ni a. A leitute an fimkhur tawk lo zawk a ni mai lo maw? Zirtira kawhmuhtu tur zawkte hian an tihtur an tihloh avang hian dem tur zawk an ni a. Thawktute dem lo hian, an zak anih chuan a changtu minister leh board chairman te hi bang ngam rawh se," a ti.

VL Krosshnehzova chuan, "ZPM hi thuneihna duh avanga pawl hrang hrang atanga tlantau awmkhawm an ni a. An insawi anga awmloh hi an nihna tak a ni. He ram ro an relnaah hian Pathian ram a thleng em? tih zawhna hi mipuiin an la chhang ang," a ti bawk.