ZALEN November 29, 2024 : MPCC Sr Vice President Lalnunmawia Chuaungo chuan Village Council term chu sawrkarin a pawt tawi thei ngei a, nawm a maka pawhseia pawhtawi theih a ni lo, chhan leh vang mumal tak a awm tur a ni a ti a, LAD Minister-in sum harsatna vang nia a sawi chu chhuanlam a tling lo niin a sawi.

Congress party-in vawiina Golden Hall, Congress Bhawan-a Political Session an hman naah Lalnunmawia Chuaungo chuan, “Thil tha, ram hmasawnna duh tak takna nena ram kan kaihhruai loh chuan mipui tan thil thalo a thleng thin. Kan sawrkar hian kan ti ang an tih an ti lova, kan ti lovang an tih an ti leh si a, chu chuan a hrin chhuah chu sum leh pai enkawl thiamloh vang a ni. Sum enkawl chungchangah hian an hlawhchham lailet der ani tih an thil tih hian a tilang a ni."

"Hmanni lawkah Village Council term an pawt tawi a, LAD Minister in a chhan nia a sawi chu sum harsatna vang a ni. Hei hi chhuanlam tling a ni lo. Lushai Hills Village Council Act 1953 Sec 5 hnuaiah sawrkarin pawhtawi theihna a nei a, amaherawhchu nawm a maka pawhseia pawhtawi theih a ni lo, a chhan leh vang mumal tak a awm tur a ni," a ti.

MPCC Vice President chuan, “Kan Senior Minister pahnihin tun hnaiah VC ten min thawhpui tha duhlo an ti a, Mipuiten kan aiawh tura kum nga chhunga rorel tura kan thlan chhuahte thawhpui duhlohna hi Democracy kalh a ni. Ram leh hnam hmasawnna atan kan VC te hian thawhpui duh loh an nei ngai lo. Congress leh MNF sawrkarah pawh a awm ngai lo. Thuneihna hman diklohna, hmansualna dik tak a ni. Keini chuan hei hi tha kan ti lo. Heng te hi sum leh pai enkawl thiamloh rah a ni," a ti.

“MNF khan sum an enkawl thiamlo em em a, an ni aia enkawl thiamlo zawk chu ZPM sawrkar hi an ni. SASCI sum an tih lapse chhan pawh Department ah sum an pekchhuah loh vang a ni a. Sum awmsa kha Minister te chenna in chei nan te, Board Chairman hlawh atan te, tul lem lova sum tamtak an senral vang a ni. Central-in State tan sum an rawn pek Department ah an pechhuak thei lova, State Matching Share kan pe thei lova, chuvangin Vaibelchhe 233 lai an ti lapse a ni. Mizoram ang sum lakluhna dang nei lovin heti zat an han ti lapse ringawt mai hi a uiawm takzet a ni," a ti bawk.