Aizawl May 17, 2024 : Thawhlehni-a LADC Chief Executive Member atan lakluh United Legislature Party hruaitu C. Lalmuanthanga, Congress MDC chuan vawiin khan LADC Session ah CEM rintawkna a paltlang.

Lawngtlai Post-in a tarlan danin LADC ah hian thla hnih chhung Sawrkar a pian theih loh hnuah Congress Member pakhat leh MNF Member 12 ten an din United Legislature Party hruaitu, Congress Member C.Lalmuanthanga chu vawiin khan LADC Session-ah CEM rintawkna Vote of Confidence neih niin, he huna tel Elected MDC 18 atangin CEM ringtawk Member 12 awmin a kalh zawngin Member 6 in ban an phar a, Chairman V.L.Hmuaka chuan CEM C. Lalmuanthanga'n CEM rintawkna a paltlang tih House ah a puang.

CEM thar C.Lalmuanthanga chuan LADC ah mipui banphak sorkar din a tulthu sawiin, Party pahnihin an siam Sawrkar ni mah se, Party bil leh thunei bik awm lo, hmasawnna atana tha turah chuan mimal thuneihna kalsan a, a tam zawkin tha an tih lamah Sawrkar chu a kal dawn a ni a ti a, CEM atan rintawkna a paltlang vangin lawmthu a sawi a, Member te chu ram rorelna ah amah finchhuah thin turin a sawm.

Vawiin Session ah hian Deputy CEM (Designated) Sanghuliana Mualchin, T. Zakunga leh V. Zirsanga ten CEM thar lawmpuina thu sawiin duhsakna an hlan.

Photo credit - Lawngtlai Post