Aizawl: Gauhati High Court, Aizawl Bench chuan MDC ruat (nominated member) ten vote an nei thei lo tiin thutlukna a siam a. Congress atanga MDC chhuak 5 te an member nihna hlihsak tura ngenna chu November 6, 2019 hian a ngaihtuah dawn.

Gauhati High Court, Aizawl Bench hian Zirtawpni khan thuremna tichhuakin Lai Autonomous District Council-a Nominated Member ten sawrkar bukna a vote an neih theih nan High Court-a an thlen chu vawi eng emaw zat ngaihtuah a nih hnu ah hmawrbawk felin, Nominated Member ten vote an nei thei dawn lova. Hetih lai hian Congress Legislature Party chhuahsantu MDC pangate an member nihna hlihsak tura ngenna chungchang chu November 6, 2019 hian a ngaihtuah dawn nia thudawn a ni.

LADC-ah hian Elected Member 25 awmin, Congress chuan Member 16 neiin, Congress Legislature Party chuan anmahni thlawptu Independent member pakhat nen member 17 neiin sawrkarna an siam a, Congress Legislature Party atangin Congress member pali leh an mahni thlawptu Independent Member pakhat chuan CLP an thlawpna hnukdawkin, MNF member 8 nen United Legislature Party dinin an hruaituah LADC Chairman ni lai, V. Zirsanga an thlang a, deputy leader atan Manghmunga Chinzah an thlang bawk a ni.