ZALEN July 13, 2024; Mizoram a Lakhuihthei thar tam ber khua Sialhawk chuan kumin ah quintal 20,000 aia thar theih an inbeisei a, chu chu Rs. Nuai 200 man zet a tling.

Sialhawk atanga ZALEN thudawn danin, Sialhawk khua ah hian Lakhuihthei ching a eizawng chhungkaw 250 vel an awm a, an Lakhuihthei thar bakah, hmun dang atanga thar chhuahte chu Mizoram mipuiin an eiseng tawh lo a, processing lamah harsatna a la awm bawk avangin a tihralna lamah harsatna an tawk thin.

Heng bakah hian an huan kalna kawng link road te chu PCC/black topping a nih loh avangin a hun taka phurh chhuah theih loh an nei nasa thin a, chumi vanga chhe hman chu a awm nual thin. Mizoram chhung bakah Silchar leh a chhehvelah an hralh ber thin a. Kuminah hian foreign a hralh leh tumin indawrna an kalpui mek bawk.

Sialhawk hi Mizoram a Lakhuihthei thar hnem ber khua niin, Mizoram a thar chhuah za a 64 te chu Sialhawk thar niin, Sialhawk chhehvel khua te nena an thar chu Mizoram thar chhuah atanga za a 91 zet a tling.