ZALEN February 7, 2025 : Vawiin khan Mizo Hnam Runah chhung inkhawm neih a ni a. MNF President Zoramthanga chuan, Mizoram CM Lalduhawma chuan Union Finance Minister Nirmala Sitharaman lehkha thawnin Covid-19 laia pawisa dawn kim loh nia a hriat kha a zuk dil nawn leh tih a sawi.

Rama chuan, "Kum 2019-2020 Financial Year chhungah Sawrkar laipuiin Budget Estimate (B.E.)-a Mizoram an rawn pek theih an beisei Vaibelchhe 3885.19 ah 3017.8 chauh an rawn release thei a. Tin, 2020-2021-ah B.E. crore 3967.796 ah 3010.55 chauh an rawn release bawk a. Tichuan heng B.E. hisap a tlin phak lohna cheng vaibelchhe 1824.8 te hi min rawn pe leh ta che u a ti a ni," a ti a. "Union Minister Pi Nirmala Sitharaman chuan hetiang hian a rawn chhang ta a. Covid kum a nih avangin chhiah tling khawm hmuh kan beisei ang kan hmu zo lo nasa em em a. Chuvangin B.E. pha zo lovin 2019-2020 Revised Estimate-ah crore 3017.80 in hmuh a ngai ta a. Chutiang bawkin 2020-2021-a B.E. pha zo lovin Revised Estimate-ah 2782.86 in hmuh a ngai ta a ni. Chuti chung chuan Financial Year kuma pek tur, chumi kuma lak khawm kim hman loh avanga a kum leh lama chumi kum hming tho a pek thin (Actual) ah chuan 2019-2020 ah crore 125.72 leh 2020-2021 (Actual) ah crore 338.30 - A vaiin hemi kum hnih atan crore 464.58 kan rawn release leh a. Chuvangin Mizoramin chhiah lak khawm (Share of Taxes) atanga in dawn tur pek kim loh kan nei hauhlo e, tiin an rawn chhang ta a ni," a ti.

MNF President chuan, "Hetih lai hian ZPM thupuangtu chuan R.E. aia Actual-a a tamna hi Covid-19 avanga Central Sawrkarin min pek belh leh MNF Sawrkarin a zep ruk tak ang hrima sawiin ‘Hei hi eng atan nge an hman’ a ti ta chiam a. Hei hi Share of Taxes State-in Central atanga a dawn pangai reng a nih avangin State zawng zawngin Share of Taxes an hman dan pangai thoa hnam vek loh theih loh a ni. Hlep ruk emaw, zep ruk emaw rual a ni lo va, hetiang tho hi State dang zawng zawngah pawh a kal dan pangai vek a ni," a ti a.

"Covid-19 avangin khawvel pumpui leh India Sawrkar pawhin a tuar nasa em em a. Finance Minister thenkhatte phei chu an lo intihhlum hialna khawp kha a ni. Chuvangin India ram pawhin namen lova tuarin MP ho Fund pawh vaibelchhe tam tak a pek loh phah hial kha a ni. Mipui atanga chhiah kan hmuh pawh a tlak hniam phah nasat em avang khan State pawhin kan hmuh tura beisei kan pha lo nasa em em a. State dangte pawh hetiang tho hi an ni. Hetiang chunga kum nga lai liam hnua lo zu thin that leh kha tu State Chief Minister mahin an tih a rinawm loh va. Union Finance Minister pawhin chiang kelh kawlh takin a rawn hrilhfiah ta nghe nghe a ni. State dang Chief Minister-te hian an hre zau ang tih a hlauhawm zawk ngawt mai, a zahthlak deuh lam chu a ni," a ti a.

Zorama chuan, "Tun hnuah chuan Pu Lalduhoma Sawrkar hian Budget awmdan leh kalphung hi chiang deuh zawkin zir hmasa tawh sela. Chutiang bawkin an thupuangtute pawhin mipui vantlang hmaa thu mawl leh a tak-a hriatte’n an nuihpui nghek nghek tur ang chi hi chu puang chhuaka mi puh kual tawh lo turin hrilhfiah hmasak nise a tha khawp mai," a ti bawk.