Aizawl: Central YMA President R. Lalngheta chuan Zirtawpni tlai dar 4:30 khan YMA Telephone Directory 2022 chu a mamawh apiang te hman theih turin Central YMA OB Room-ah a tlangzarh. Kum 1 dana siam thin YMA Telephone Directory hi nikum 2021 kha siam thar leh hun a nih rualin hripui avangin siam a ni lo a, kumin 2022 hian siam thar leh a ni ta a ni.

YMA Telephone Directory siam tharah hian Central YMA OB leh Central Executive Committee member-te mobile phone no. te, Central YMA hnuaia Sub-Committee member-te biak pawh theihna number zawng zawngte a awm vek a. YMA Sub Headquarters hruaitute leh Group hrang hrang hruaitute bakah kum 2022 chhunga Mizoram chhung leh pawna YMA Branch 816 a hruaitute mobile phone number te tarlan vek a ni. YMA kaihhnawih telephone number bakah hian mipui mamawh hrang hrang Hospital & Emergency Services leh tul pawimawh dang te biakpawh theihna tur phone number pawh telh vek a ni. 

Directory hi bu khat Rs. 100/- zela hralh chhuah tura ruahman a ni a. Central YMA Office-ah Office hun chhungin lei theih a ni ang. YMA Telephone Directory 2022 hi Central YMA hnuaia Resources Sub Comtt. te buatsaih a ni.