Aizawl July 13, 2024 : Vawiina Lunglei Congress Bhavan-a Lunglei Town Congress Workers' Meet hman naah tunhnaia Congress zawm thar Lalnunmawia Chuango chuan he party a zawm chhan hi a sawi a, ram leh hnam damna an duan Reform Agenda pawmpui awmchhun an nih vanga zawm an nih thu a sawi. 

Lalnunmawia Chuaungo IAS (Rtd) chuan, "Mi tam takin engvangin nge Congress Party-ah in luh ve ngawt? tiin min zawt ṭhin. Congress Party a ka luhna chhan hi kan ram leh hnam damna tur nia ka hriat Reform Agenda kan tih mai hi kan duang a. Party ṭhenkhatah chuan he Reform Agenda hi zawrh chi niah an ngai lova. Party ṭhenkhatte te chuan an ngaihsak zui duh lo thung. Congress Party hotute erawh kan pek khan a zir chianna an neih mai bakah, a hruaituten a hranpa a zir chianna an neih bawk avangin Pu Lalsawta kaihhruai Congress Party hi luhna tlak berah ngaiin kan rawn lut ta a ni," a ti.

Lalnunmawia Chuaungo chuan, miretheite leh khawsak harsa zawkte hamṭhatna tur scheme an siam te a nihna ang taka a dawng turten an dawn theihna turin hma an lak tur thu a sawi a. Sorkar ṭha nei tur chuan Chief Minister ṭha kan neih a ngai a. Party lian hruaitu pathum hi mipuiten kan zir chian a ngai. Dawt hmanga mipui hnena in zuar ṭhin an ni em? Sum leh paiah an rinawm em? Ṭawngkam thiam avang ringawta mipui bum tum ṭhin an ni em, tih kan zir chian a ngai, a ti bawk.