ZALEN July 23, 2025 : Dampa Bialtu MLA, Lalrintluanga Sailo vuina, vawiin a a chenna in, Luangmuala buatsaih, official programme-ah House Leader Lalduhoma, Chief Minister chuan thu a sawi a, Lalrintluanga Sailo, MLA chhungte tan sawrkarin a tih theih apianga a tih tur thu a sawi.

Lalduhoma chuan House leader a nihna leh an party aiawha ding a nih thu a sawi a. "Mizoramin sitting MLA hi mi 10 kan chan tawh niin ka hria a. Vawiina kan vui mek Pu Lalrintluanga Sailo hi legislator tha, debater ropui tak a ni. Ka nau a ni a, a hmingin kan ko mai, Pu kan belh ngai lo. Kan nupa hi u angin min en a, kan ngaina em em a ni. 1993-a Bilkhawthlir biala ka zuk din khan ka campaign Chairman a ni tluan zak a, kan riak dun zel thin. Tunah kan han MLA dun a, Session-a kan han che vel te hi mi inhal tak emaw min ti mai thei. Mahse a ni lo, kan innel em em zawk a ni," a ti.

"Assembly Session-a a thusawi hnuhnung te nizanah ka thlirlet a, ka lung a leng hle a, lawmthu sawiin a thu hnuhnung te kha a khar a ni.' A nupui fanaute lo thlaphang lo ula, thian tha tam tak in nei tih hria ang che u. Sawrkar pawhin a tih theih apiang a ti dawn a ni," a ti.

Deputy Speaker Lalfamkima pawhin thusawiin, Lalrintluanga Sailo chu pa tha tak, mite khawngaih thei tak, nelawm tak a ni. Ram tana a thahnemngaihnate kan hre reng dawn a, a tel lo va Assembly House kan han kalpui tur hi ka huphurh hle, a ti a. Delhi-a cham mek Speaker Lalbiakzaman a rawn thlahna thuchah a sawi bawk.

MNF Legislature party aiawhin Lalchhandama, Leader of Opposition chuan thu a sawi a. Lalrintluanga Sailo chu an legislature party Deputy Leader a nih thu tarlangin, an party chhungah leh party dang thiante nena inpawhtawnna kawngah a thawhhlawk hle a, an ngaina vek a ni. Lehkha zir sang tia sawi tlak ni lo mah se mi fing a ni, a ti.

Lalrintluanga Sailo hi MLA ni lai a nih angin Lalthangmawia, Addl. Secretary, Mizoram Assembly Secretariat chuan Mizoram sawrkarin Lalrintluanga Sailo a sunna Gazette a chhiar chhuak a. House-a a thusawi zat te a tarlang bawk.