ZALEN March 17, 2025 : Mizo Hnam Run chhung inkhawma thusawitu Lalruatkima, Ex. Minister chuan, "MNF sa kah hliam, ZPM sawrkarin a kapthlu a. MNF kuhmumah ZPM an par a ni. Assam Rifles sawnchhuah an ni dawn ta hi a lawmawm takzet a. Hma lo la a bul lo tantu Pu Laldenga (L) leh Zoramthanga kaihhruai MNF sawrkar khan fak a phu a, Zoram mipuiten an hre reng tawh ang," a ti.

Ruatkima chuan, Assam Rifles te insawnna tur leh a kaihhnawihah MoA chu 23.10.2024 ah ziah a ni a ti a. He MoA hi MNF sawrkarin 8. 9. 2023-a a lo duan tawh ang deuh vek kha a ni a. Chutihrualin Khatlaa an ram luahzui tur chu teh thata chhiah chawi ve tura tih chu paih a ni a. Tui leh eng pek chungchangah leh AR ten an chhuahsan In leh hmunhma man Mizoram sawrkarin a pek tur thuah mipui leh sawrkar tana phurrit awm thei a ni a. Ngaihtuah mang lo leh zirchiang lova duan a ang hle a ni, a ti.

Assam Rifles te sipai lammual leh a chhehvel atanga Zokhawsanga sawnchhuah an nih theihna atana MNF sawrkarin theihtawp chhuaha hma a lo lak tawhna te kha a document zawng zawng nen hmuh theihin a la awm a ni.

Ministry of Home Affairs office memorandum, Shifting of units from Aizawl - Zokhawsang, behchhanin khatihlaia MNF sawrkar Pu Zoramthanga kaihhruai chuan 2019 May thla ral hmaa AR insawn tur chungchang hi a lo sawi tawh a. SP (Traffic) ah movement permit dil niin, March 23, 2023 khan sipai motor engemaw zat hmangin bungrua, ralthuam leh a dangte nen an lo insawn tawh. A bo a bang awm lova Assam Rifles te insawnna tur erawh chu state sawrkar thuneihna piah lam a ni, a ti.

Revenue minister hlui Lalruatkima chuan, Sipai lammual leh a chhehvel atanga Zokhawsanga Assam Rifles te insawnna tur hmun hi ni 14.1.1987 ah Laldenga kaihhruai MNF sawrkarin a pe a. Zokhawsang ram hi enfel thuai anih tur thu Chief Secretary leh Brig. SC Goswami, DIG ten an remti a. Helai hmuna mimal ram neitute hnenah cheng nuai 92 chuang zangnadawmna atan pek a ni. Hemi hnu hian Pu Dengchhuana, DC Aizawl leh Col. Gulsharan AR aiawhten ram inhlanna certificate an ziak ta a ni. (Vide Memo No. F 12012/6/85-DC(A) 291 Dated 31st May, 1988) Land Lease siamfel zui a ni a, AR ten he ram hi an cheibawl nghal bawk.

MNF sawrkar (1998) vêkin mimal leh thil ti thei ten AR chhuahsan ram an neih mai loh nan dan an siam a. MHA atanga building leh thildang sakna tur sum engemaw zat an hmuh hmangin Assam Rifles ten Zokhawsanga an hmunhmate an cheithar ta zel a. Congress sawrkarin Assam Rifles insawn chungchang chu ti thuanawpin, Lammual atangin Zokhawsangah nilovin Khatlaah sawn an nih tur thu an puang a (Gov't PR No. 274/92,28th May, 1992).

2018 MNF lo sawrkar leh chuan AR insawn chungchang hi nasa taka buaipui chhunzawmin, chhuanlam an siamte a ngaihtuahsak zel a. Khatihlaia Chief Minister Pu Zoramthanga chuan theihtawp chhuahin, Union Home Minister Amit Shah chuan Assam Rifles te Zokhawsanga an insawnna tur lungphum chu ni April ni 1, 2023 khan a phum ta a. An chhuahsan turah Laldenga Cultural Centre Foundation lungphum a phum nghal bawk a ni.

MHA duan MoU chu vawi duailo thlirho a ni a, AR chhuahsan tura mimal ram neite LSC cancel na tur chu MNF sawrkar cabinet meeting in March 8, 2019 khan a pawm ta bawk a. AR te hnenah Memorandum of Agreement draft chu thawn niin, hetah hian MNF sawrkar hmalakna hrang hrangte tarlan a ni, a ti.

MNF treasurer chuan, "India leh khawvel ramdang hruaituten an rin em em, thenawm ramte nena inlaichinna leh khawvel politic nghawng thei thila biakrawn hlawh, palai atana an duh fo thin hruaitu tha MNF ten kan nei hi kan vannei hle a ni," a ti a. Politics ball chhuih um mai mai lo turin party mipui kalkhawmte a fuih bawk.