ZALEN April 19, 2026 : Zoram People’s Movement (ZPM) thupuangtu, B.Lalchhanzova chuan, “Lammual hman zui dan tur relnaah party mal angin ZPM hian engmah inrawlhna kan nei lo a. Advisory thurel kalh zawng emaw, advisory member-te rorel tihrehawm zawng emawin engmah tih kan nei lo, committee thurel ang zela kal chho a ni,” a ti.

Nimin Aizawl Press Club-a chanchinbu mite a kawmnaah B.Lalchhanzova chuan, “October 23, 2024 khan Mizoram sawrkar leh Assam Rifles chuan Zokhawsanga an hmun thara an insawn tur chungchangah Memorandum of Agreement kan sign a. Hemi thu kal zelah hian Lammual enkawl zui dan tur duangtu atan Advisory Committee chu April 28, 2025 khan chief minister chair-na hnuaia kalpui turin din a zui a ni a. Official-te bakah NGO leh political party pawl 14 telh an ni a, committee pawh vawi nga lai neih a ni tawh a. Lammual area kawng laih zauh kalpuina kawngah pawh hian Advisory Committee-in a rel anga kalpui a ni a. Thing suat vak vak emaw, Lammual hmunhma hi tihchereu vek emaw hi a tum a ni lo a. Kan ram tana tha ber tur, Aizawl khawpui tana tha ber tur ngaihtuah chunga hmalak a ni,” a ti.

Mizoram Universal Health Care Scheme (MUHCS) chungchang sawiin, “Mi tam takin an tangkaipui mek a, kan state-in a neih tawhah chuan tuna scheme aia tha hi a la awm lo niin a lang a. Mi tin huap, khua leh tui nihna neiten an hman vek theih tur a ni a, opposition emaw, ruling emaw tumah he scheme hian a thliar lo a. MNF leh Congress mipuite hi an party hotute hian an lainat lo hlein kan hria a, an party miten hmang ve lo se an ti zawk em ni aw a tih hial theih a ni. Keini chuan MNF leh Congress party mite pawh an puten sawisel mah se he healthcare scheme hi tim miah loa hmang tangkai vek turin kan ngen a ni,” a ti.

Buhfai chungchang pawh sawi bawkin, “Buhfai bo thlau te, sum kal ralte venna lam uar taka kalpui a nih avangin kum kal ta, 2025-26 chhung khan sawrkarin bugdet-ah Rs. vaibelchhe 220.60 a dah atangin Rs. vaibelchhe 139 lai mai sawrkar treasury-ah chhun let leh a ni a. Centre atanga puihna lo let leh bakah bank pungte nena (Rs. 14 crore approx.), belhkhawm chuan Rs. vaibelchhe 153 hial a lo ni a, kan budget atanga chhutin 70% vel a ni a. Buhfai supply-na rate bituktu hi chief secretary chair-na hnuaia State Purchase Advisory Board (SPAB) kalpui a ni a, minister inrawlh theihna a ni lo. SPAB-in rate a approved ang kha minister chuan a lo pawmpui mai a ni. ZPM sawrkar hnu hian SPAB thutlukna ang zela kal a ni,” a ti.

AMC-ah sawrkar an chan chuan an hmalak dan tur puangin B.Lalchhanzova chuan AMC dawr har lutuk te, sawipuitu tha neite tan chauha thil tihawlsam anga ngaih thin AMC hi mi tin ban phaka hnuh hniam an tum tih a sawi a. Hei bakah AMC-in mipui atanga a sum khawn hrang hrangte langtlang taka hman tum a nih thu te, Aizawl khawpuia cheng municipal area chhung ni si, tun thlenga PHE connection la nei ve lote tan a kaihhnawih department nen tangrualin pek vek an tum tih te, Aizawl khawpui chhunga vawk vulh khapna dan ennawn an tum tih te, ran talhna (slaughter house) siam an tum tih te, Solid Waste Management Center tihchangtlun tum a nih thu te, building permit leh lei laih permit (SD&SM) ennawn an tum thu te a sawi a. Aizawl mipuite chu ZPM party candidate-te vote theuh turin a ngen.