ZALEN February 17, 2025 : February 12, 2025 (Nilaini) zana tawhsual tawka boral ta, Member Lalfakmawia tual thihna chu Bungthuam Branch YMA leh Langkaih Group YMA chuan pawi an ti a, a rang thei ang berin Sawrkar-in chhuichhuak vat se an ti.

Lalfakmawia s/o Liansawta (L) ralna hi February 16, 2025 khan Group YMA hmingin a chhungte hnen ah hlan a ni. Nimin chawhnu vek khan Kanhmun Police Station ah Kanhmun OC leh SDPO Kawrthah te kawmna hun an nei a, an hnu chhui dan an hriat awm te hrilh a, an hmalakna fakawm an tih thu an hrilh.

Group YMA chuan Thinghlun, Mitdel lui leh Kanhmun police check gate te zan lamah, tun aia nasa zawk a duty uluk lehzual turin an ngen nghal bawk a ni.

Lalfakmawia thihna hi Langkaih Group YMA chuan a ngai thu tak a, he tual thihna a mawhphurtute hi Mizoram Police te'n a rang thei ang bera chhui chhuak a, an phu tawk hremna an hmuh ngei Langkaih Group YMA te chuan an ngenin an phut. Hnu chhuitu Police te tha ti chak tura, tih theih an nei a nih chuan Langkaih Group YMA chu an in peih reng a ni, an ti.

Tripura leh Assam ramria awm an nih avang leh, Langkaih Group YMA huam chhunga misual pawilkhawihna a thlen nawn fo tawh loh nan a, venhina hna thawktu Police te thuam chak turin Mizoram Sawrkar pawh an ngen a, Lalfakmawia tual thihna chungchangah thu belhchian dawl lo, thehdarh lo turin mipui an ngen bawk a ni.