ZALEN, Mar., 2025: Mizoram University (MZU) chuan an convocation vawi 19-na chu Thawhlehni khan an campus-a Multipurpose Hall-ah hmangin zirlai 7,724 hnenah degree an hlan a. He hun hi Mizoram Larsap General (Dr) Vijay Kumar Singh, PVSM, AVSM, YSM (Retd), Chief Rector of Mizoram University-in khuallian nia hmanpuiin Chief Minister Lalduhoma’n khualzahawm niin a hmanpui bawk.

Convocation-ah hian MZU hnuaia zirlai degree hlante hi Doctor of Philosophy 104, Master’s Degree 567, Master’s Professional 149, Bachelor’s Degree 143, Bachelor’s Professional 176, Gold Medalist 51 leh Book Prize winner pathum an ni.

Khuallian chuan degree, medal leh lawmman dawngtute duhsakna hlanin, “He hunah hian zirna a hlawhtlinna mai ni lo, tanrualna a taka lantirna lawm tura kalkhawm kan ni a, tuna hlawhtlinna kan chante hi hma lam hun atana min kaihruaitu leh chakna min petu nise a duhawm hle ang,” a ti.

Larsap hian kum 2001-a central university ni tan, MZU-in tun hnaia dinhmun a neih - NIRF-in India university tha 77-naa a thlang te, Times Higher Education Impact Rankings 2024-in hmarchhak university zinga 1-naa a thlang te, Indian Institution Ranking Framework (IIRF) 2024-in central university tha zual a thlan chhuah 20 zinga 15-na dinhmun a hauh pha leh faculty panga leh research scholar pakhat te Stanford University zirchianna, September, 2024-a tihchhuahin khawvela scientist tha zual thlan chhuah za zela pahnih zinga a dahte chu chhuanawm a tih thu a sawi lang.

General (Dr) Singh chuan MZU-in hmasawnna leh hmalakna a neihte sawi langin lawmawm a tih thu a sawi a. Zirna kaihhnawih thil dang, vantlang rawngbawl hna a thawk thin pawh ropui a tih thu sawiin, “Zirna hi academic chauh ni lo, kawng engkima mi mal hmasawnna, zirlaite nunkawng dika kaihruaitu tur a ni,” a ti bawk.

Mizoram assembly-in state pual university dinna tur, ‘Mizoram State University Bill, 2025’ a pawm pawh lawmawm a tih leh MZU chu kum 2035-ah chuan ngawrh zawka research kalpuina tur a nih theih dawn thu a sawi.

Khualzahawm pawhin degree dawng tharte a lawmpui thu sawiin hun rei lo te chhunga hmarchhaka university changtlung ber zinga mi a ni thei chu chhuanawm a tih thu a sawi a, Mizorama zirna in sang ber a nih angin zirlai leh researcher-te tan hmasawnna tur thil thar a chhawpchhuah sak zel a beisei thu a sawi bawk.

Chief minister hian Mizoram chu kum kha leh chen inthliarna awm lohna a nih thu sawiin, university leh a hnuaia college hrang hrang thuneitu leh zirlaite chu mi dang tihduhdah leh diriamna ‘ragging’ awm lo tura hma la zel turin a chah a, “Zirna hmunah inremna leh zahawmna vawn him tlat a tul a ni,” a ti.

MZU Convocation vawi 19-naah hian faculty leh staff-te bakah zirlai chhungte an tel a ni.

MZU hi kum 2001-a din niin department 37 a awm mek a. Centre pahnihin School of Study 10-ah UG, PG leh Ph.D programme an kalpui mek a. Affiliated College 40 leh constituent college pakhat a nei mek bawk.