February 19, 2023; Mizoram Larsap in Mizoram mipui zawng zawngte an khaw hawi ti zau a, midangte khawsak phung te hriatthiamsak tum turin a chah.

Mizoram State Day pual a thuchah a tih chhuah ah Mizoram Larsap Dr Hari Babu Kambhampati chuan, Ek Bharat Shreshtha Bharat in a thil tum angin, Mizoram mipui zawng zawngte chu an khaw hawi ti zau a, midangte khawsak phung te hriatthiamsak tum turin a chah a. Chu chu kan hnam ziarang hloh lova tih theih a nih thu a sawi.

Larsap in a tarlan danin, kum 1986 June ni 30 ah central sawrkar leh Mizo National Front inkara inremna thuthlung (memorandum of settlement), Mizoram Peace Accord tia hriat bawk chu ziah a ni a. Hemi ni atang hian Mizoram chu state puitlingah hlankai kan ni. 

He remna thuthlung pawimawh tak hian kum 20 chuang rambuai chu a rawn ti tawp a, kum 1987, February ni 20 khan Mizoram chuan state puitling angin kawng engkimah bul a tan a ni. 

"Peace Accord avang hian Mizoram chu central sawrkarin state min pe tih hi kan hriat a pawimawh hle a. Mizoram pawh hian kan intiamna te rinawm taka vawng tlatin kum 37 chhung chu state ralmuang ber kan ni mek a ni," Larsap chuan a ti bawk.