Aizawl : February 1, 2024 zing dar 12:00 pelh hret khan Lawipu Vêng, Aizawlah Bolero pic-up chuan Lawipu Vêng Presbyterian Kohhran Biak-In hnuai chu su-in, motor hi a let a, vanneih thlak takin thi leh hliam an awm lo. Kawngpuiah Motor hi a inkham a ni.

Motor a chesual a ni tih an hriat ve lehah a bul hnaia mite tlan khawm nghalin, khawtlâng hruaitute pawh an thleng rang hle. Motor hian dawr bungrua a phur nasa hle a, chu mi kârah chuan Zu (Whiskey) case thahnem tak hmuh a ni ta a ni.

Lawipu Vêng YMA President H. Lalhriatpuia chuan motor khalhtu hi Silchar mi, Mojadul leh a zuitu Nibran a nih thu sawiin, rang takin police an bia a, tunah chuan motor khalhtu leh a zuitu chu police-in an lak tawh thu a sawi. Driver te hian an kalna tur kawng an hai thu an sawi ve bawk.

Lawipu khawtlâng mipui ten bungrua hi thiarin, motor chu an hnûksawn a, bungrua hi felfai taka remin tunah chuan motor dang a kal tlang thei tawh.