Aizawl: Mizoram chhim lam Siaha leh Lawngtlai district hospital pantu zingah pumna an tam ber.

Tunhnaia heng damdawiin pahnih tlawhtu chanchinbumi te hnenah he thu hi sawiin Siaha leh Lawngtlai district hospital thawktute chuan pumna dawtah chuan malaria leh rannung seh an tam tih an sawi a. District pahnih ah hian HIV a hluar ve tih sawiin tunhmaa Mizoram ti hmingchhetu pakhat nausen thihna ‘infant mortality rate’ pawh tunhma ngaihtuah chuan a tlahniam hle niin an sawi bawk.

Thla 9 chhung khan Siaha damdawi in a nausen thi 13 leh nu nau chunga thi 1 an awm a, nausen thi an tam chhan hi an district pawn Lawngtlai district, Sangau tlangdung leh Myanmar lam ten an pan nasat vang niin damdawiin thawktute chuan an sawi a. Lawngtlai District hospital pantu zingah pawh pumna an tam ber a, pumna bakah malaria chu an case neih langsar a ni tih damdawiin thawktute chuan chanchinbumi te an hrilh a, malaria vanga thi erawh an awm lo niin an sawi bawk.

Siaha ah hian khum 100 awm theihna tur hospital sak mek niin November thla chhung hian luah hman beisei a ni. Lawngtlai district hospital ah hian khum 34 a awm mek a. Khum 50 awm theihna tur damdawiin chu sak mek a ni. Lawngtlai district hospital hian ni kum 2018 khan Mizorama Hospital fai ber lawmman 'Kayakalp Award' an dawng a, kumin ah pawh fai lawmman hi dawn leh ngei tumin tan an la nasa hle.