ZALEN, Apr. 14, 2026: Lirthei zuar zinga Mizorama hralh tam ber, LBS Suzuki chuan thla liam ta chhungin Burgman 400 chuang an hralh a, Thawhlehni khan showroom, Bawngkawn, Aizawlah a chhuak thar, Burgman Street an tlangzarh.

April 2 khan India ramah tlangzarh a ni tawh a, ni 12 hnuah LBS Suzuki Managing Director Joseph Lalthanpuia leh Loz Hnamte chuan Mizorama hralh chhuah turin an khuh hawng a. Tlangzarh inkhawmah hian hauh lawk mi 120 zinga 10 hnenah an pe chhuak nghal bawk. 

Info Bikes chief test rider Vanlalmuana chuan Burgman Street thar chu an khalh chhin tawh tih sawiin, “A chhuak hmasa aiin seat a hniam a, engine inang mah se a pickup a chak zawk a, a suspension an tihdanglam avangin a sawh a na lo sawt bawk,” a ti. 

Burgman Street hi chi hnih - tihnun nan chabi hman ngai lo leh hman ngai a awm a; a hmel leh pianhmang tidanglamin a hma aiin a pui hmel zawk a. Khalh hahdam leh nghet, ke thluan theih leh gas phurh theih, seat sei tha a la ni reng chungin changkang zawka thuam a ni a, seat hnuai hawn ngai kher tawh lovin petrol a thun theih tawh bawk. 

Rs 1,47,995 (on-road price)-in chabi ngai lo chi hi lei theih a nih laiin chabi hman ngai lei nan Rs 1,37,974 sen a ngai ve thung. 

LBS Suzuki hi Suzuki Motorcycle India hnuaia dealer hrang hrang zinga lian leh hralh hnem ber pawl a ni ngar ngar a. Kumin bikah thla thum liam ta chhungin two-wheeler 2,706 an hralh a, heng zingah hian mipuiin Burgman an lei hnem. 

February khan 1,001 hralhin thla liam taah an tla hniam hret a, 940 an hralh a. March bikah hian Burgman 401 hralhin a tam ber a, Access 399 hralh bawkin an inthlau lo viau thung.