ZALEN February 14, 2025 : MPCC-in Congres Bhavan-a Political Friday session leh LC/VC te lawmthu sawina an neihah president Lal Thanzara chuan tun inthlanna result atang hi chuan Congress party chauhin hlimna tur a nei. ZPM ten inthlan hun pangngai August-a inthlan anih chuan an chhe lutuk ang e tiin term an pawt tawi a. Mahse, an beisei ang a ni lova an tan a lawmawm viau lo ang, a ti.

Lal Thanzara chuan, "MNF ten fund nen campaign an bei a, ZPM party tan sawrkarna chang hlim siin Local Council/Village Council a sawrkarna nei tlem hi an la awm lo. Local Council ah te hian Aizawl khaw chhungah a let dawn a tam Congress in kan la thei a ni."

"Aizawl khawpui laili ah Chanmari ah bak ZPM hian sawrkarna an chang lo, Dawrpui ah kan thawhpui party te nen sawrkarna kan siam a, Electric Veng, Zarkawt leh Armed Veng ah te hian Congress in sawrkarna kan changa, Synod hmunpui Mission Veng ah Congress in sawrkarna kan la bawk. Tin, Mizoram Chief Minister Pu Lalduhoma chenna veng Chawlhhmun ah pawh Congress party-in Local Council Member kan neih belh a, Unit te an phur thar hle a ni," a ti. 

MPCC President chuan, "Congress in sawrkarna kan siam tirh 2009 kum khan VC inthlanna ah VC 444 a la, hei hi VC awm zawng zawng atanga chhutin 80% a ni. MNF in sawrkarna a siam tirh, 2020 kuma VC inthlanna ah khan VC 327 a la, hei hi VC awm zawng zawng atangin 58.60% a ni. ZPM in sawrkarna a siam hnu lawk 2025 VC inthlanah hian VC 266 la in 48.98% ah chauh hnehna a chang. Hei hian kum khat lek chhungin ZPM sawrkar lakah mipui rinna a tlakhniam chak zia a tarlang a ni. Kum 2020 Local Council inthlanah khan MNF-in Local Council 71 changin Congress in 5, ZPM in 2 an chang ve thung a, tun 2025 Local Council inthlanah hian Aizawlah Congress Party chuan Local Council kan neih hi pariatah a pung chho tawh a ni," a ti bawk.

.

Nikum lawka Lunglei Municipal Council inthlannaah ZPM te hi hnehna sang tak nen Ward 11-ah an chak fai vek a, hemi hnu lawk kumin Local Council inthlannaah chuan Local Council 8 lek an la a ni. Hetih lai hian kum 2025 Local Council inthlanna ah chuan Lunglei ah hian Congress in hma nasa taka sawnin Local Council 6 ah sawrkarna kan siam thei ta hial a ni.