Aizawl May 11, 2024 : Aizawl Municipal Corporation in Aizawl khawpuia chengte hriselna atan vawk vulh khuahkhirhna a kalpui mekah vawk vulh chhunzawm dilna 8,731 an dawng a. Heng dilna te hi AMC leh Local Council ten a hmunah an endik mek a, Local Council 85 zinga 75 te chu endik tawh a ni. Endik hna hi vawk hri (African Swine Fever) leng avangin chawlh lailawk rih a ni.

Aizawl mipui ten sa thianghlim zawk an ei theihna tur leh thianghlimna kawnga ke pen zelna turin, AMC chuan ran talhna hmun (Slaughter House) mumal tak nei turin ruhmanna a siam mek a. Tunah hian hmun 12 ah ruahman­na a siam tawh bawk.

Aizawl Municipal Corporation (AMC) thuchhuah tarlan danin AMC chuan thawktu indaihlohna nasa tak a nei a, tunah hian sawrkarin a phal zat officer leh staff post atanga 43% chauh hnawhkhah a ni a. Heti chung hian a theihna ang angin Aizawl khawpui hmasawnna leh thianghlimna kawngah chak takin hma a la tih an sawi a. BSF headquarter septic tank leak chungchang leh Tuikual luia Septic Tank thli lut chung-changah pawh hma an la tih sawiin AMC chuan April ni 23, 2024 khan order chhuahin, Local Council zawng zawngte an huam chhunga Septic tank soak pit nei lo emaw nei tha lo emaw te chu ni 30 chhungin report pe turin an hriat­­tir tih an sawi bawk.