Aizawl; Nikum 2020 chhung khan Mizoramah legal metrology dan bawhchhia mi thahnem tak man an awm a, mi 69 thubuai a siamsak bawk.

Legal metrology thawktute hnen atanga ZALEN thudawn danin, nikum chhung khan Mizoramah ‘The Legal Metrology (Packaged Commodites) Rules, 2011’ bawhchhia mi 69 thubuai siamsak an awm a, dan bawhchhiatna tam ber chu MRP tihchhiat leh a manto a hralhte niin ram dang siam bungruate a ni tlangpui. Hemi chungchangah hian bazar leh kudam, sumdawnna hmun vawi 226 endik niin, mi 69 thubuai siamsak an awm.

The Essential Commodities Act, 1955 hnuaia dan siam, quality control order hmanga petrol leh diesel, cement quality endikah kum 2020 chhung khan petrol/diesel phurtu tank lorry 1,493 endik niin, petrol khawih chingpen tank lorry pakhat man a awm.

LPG phur truck 1,062 endik ni bawkin, buk tling lo agency-te hnen atangin bur 296 man a awm a, legal metrology dan angin a khawih chingpentu pawisa chawitir niin, dan lova LPG hralhru bur 66 man a awm bawk.

Kum liam ta 2020 chhung khan bukna diklo hmang mi 27 man an awm a, chung mite pawisa chawi zat chu Rs 2,91,000 a tling. Cement leh rod zuar vawi 135 endikna neih niin, iron rod buk tling lo, a tlawna hralh 271 man a awm a, sumdawng pahnih thubuai siamsak an ni.