November 7, 2022; Aizawl Municipal Corporation (AMC) in lei laih leh leivung paih khap hun a siam July - October a zawh hnuah, hmun hrang hrangah in sa tur ten lei laiin, leivung an paih chho tan mek a. Hetihlai hian AMC area chhungah leivung paih phalna hmun 8 a awm.

AMC chuan chhiatna leh nunna chan palhna a thlen lohna turin July - October chhungin lei laih leh leivung hmanga ruam/kawr chhun a khap a. Khap a nih nachhan hi Mizoramah fur pui laia lei laih vangin chhiatna leh nunna chan palhna thleng thin venna tur a ni.

Lei laih leh leivung paih khapna AMC in a siam bawhchhia hremna pek mi 8 bawr vel awm mahse, a tlangpuiin, mipuiin an zawm tha hle niin AMC chuan a hria a, kumdang aiin lei laih vanga chhiatna thleng pawh a tlem niin a hriat. Mi thenkhat AMC thuchhuah hrelo te erawh an awm thin a, hemi vang hian khapna order chhuah a nih hnuah mipuite hriat nawn tirna thu pawh AMC chuan a lo chhuah tawh bawk.

Hetihlai hian lei laih leh leivung paih khapna hun (July-October) a zo a, Aizawl hmun hrang hrangah in sa tur ten lei laiin, leivung an paih chho mek a, AMC huam chhungah lei vung paih phalna hmun 8 awmin, chungte chu Tuirial Road, Near RD Godown, Zemabawk te, World Bank Road, (Near College Veng Thlanmual road) ITI te, Durtlang Leitan, (Near Bethel Camping Centre), Govt. Complex, Durtlang Leitan (Zuangtui Selesih Road), World Bank Road (Near Zampuimanga Thlan) Melthum, Luangmual (Near Govt. Complex), Luangmual (Near Govt. Complex) te a ni.