Euro 2004-a Otto Rehhegal-a’n Greece a champion-pui nawlh kha thil mak a tling a, hemi hnu kum 10 chuangah Claudio Ranieri-a’n mak tak bawkin Premier League-ah Leicester City a champion-pui leh bawk a. Italian manager hian thil mak tih theihna a la keng zel a, manganga kotu, Cagliari chu Italian league sang berah a kaipui leh ta.

2014-15 season-a Foxes an champion tum khan Ranieri-a team hian chance awm 5,000-a pakhat chauh nei ang hialin an sawi thin a, theih loh ang tluk a ni a; mahse, football-ah chuan thil mak a thleng fo thin tih tichiangtute an ni.

Kumin January 1 khan kum 1988 atanga 1991 chhung a lo enkawl tawh, Sardinia team mangangin an ko kir a, hetih lai hian Serie B-ah pakuana an ni a. A hova an khelh hnuah erawh vawi 19-ah vawi hnih chiah tlawmin panganaah season a kharpui a, Serie A kaipui nghal lo mah se kai tur zawnna (play-off)-a tel turin an dinhmun a sawh nghet.

Italy-ah hian Serie B atanga A-a kai tur hian a chhawng khawp mai a, champion (Frosinone) leh a dawt (Genoa) ten an kai nghal laiin pathumna atanga pariatna thlengin play-off an khelh a ngai a. Pathumna hi point 14 leh a aia tama palina aia an san chuan play-off khelh ngai lovin an kai sang nghal thei bawk.

Tun season-ah hian Ranieri team bakah Bari, Parma, Sudtirol, Reggina leh Venezia te chuan kai sang tur zawn an ngai.

Play-off hi round thum zet a ni a. A hmasa berah hian league-a pangana leh pariatna leh parukna leh pasarihna an inhmachhawn phawt a. A chak ve ve hian pathumna leh palina hmachhawnin semifinal an khel thin.

Ranieri team hian round hmasa berah hian pariatna, Venezia an hmachhawn a. An chak hnuah semifinal-ah palina, Parma hmachhawnin an hneh leh a. Kai sang tur inchuhnaah Pathianni zan khan Bari chu an hneh leh ta a ni.

Khelh hmasaka 1-1 a an inhnehtawk a, khelh hnihnaah Leonardo Pavoletti-a’n minite 94-a a thun hmangin Stadio San Nicola-ah hnehna changin Serie A-ah a team a kaipui ta a ni.

A enkawl hmasak hun laia Serie C atanga B-a lo kalpui tawhtu, Ranieri hian a team-in league sang ber an khel tur chu a lawm ve tak zet a, a mittui a dang zo bik lo. “Ka tan chuan Cagliari hi engkim a ni tawp mai,” tiin a sawi.

“He kawr hi ka tan chuan a bik hliah hliah a. Premier League-a kan champion pawh khan Rossoblu rawng hi ka rilru-ah a awm reng.

“Sardinia-a min ko lettute chungah ka lawm a. Kan fan, kan mite, khelmuala lo kal kher lote pawh, kan khelmual kan nei lian lo va, a tawp thlenga min thlawpnaah ka lawm a ni,” a ti.