Uttarakhand-a leiverh chima tang mi 40-te chhanchhuah tumin rescue team chuan beihpui an thlak chhunzawm zel a, darkar 170 chuang a ral tawh a, kawng dangin lak chhuah dan tur thar kalpui leh tan mek a ni.

Leiverha tang thawktute hi ni sarih zet an tan tlin tak avangin an hriselna dinhmun ngaihtuah a na tan ta hle bawk.

Thuneitute chuan Pathianni atang hian an tihdan thlakin tlang chhip atangin lak chhuahna tur an verh tan leh ta bawk.

Tang mekte hi biakpawh theih an ni a, ei tur leh tui pawh pek luh theih an ni bawk.

Tlang chhip atanga verh tur hian Inrinni zan atang khan a hmunhma tur buatsaih hna thawh tan nghal a ni a. Madhya Pradesh-a Indore atanga thlenpui leiverh khawl hmangin verh tum a ni.

Inrinniah khan Prime Minister’s Office (PMO) aiawh leh mi thiamte pawhin a hmun hi an tlawh a, chhanchhuahna tura ruahmanna chi nga an neihte an enpui.

“Mi thiamte hian ruahmanna pakhat chauh kalpui ai chuan a rualinruahmanna chi dang nen kalpui tha an ti a, chu chu a hma thei anga thawktu tangte lak chhuahna kawng a nih an ring,” tiin prime minister advisor thin, Bhaskar Khulbe chuan a sawi.

Khulbe chuan mi tangte hi ni li ni nga hnuah chuan lak chhuah theih an beiseiawm niin a sawi a, “Mahse, pathian thu thu a ni a, a aia hma pawh a ni thei,” a ti.

Zirtawpni zanah khan lei khi thawm hriat a nih avangin a verh hna thawh lai chu an lo tawpsan lailawk tawh bawk.

Sorkar laipui pawhin thawktute chhanchhuah dan tur hi a ngaihtuah a, ruahmanna chi nga awmte chu agency hrang hrangte nen an sawiho.

NHIDCL-a mi, MD Mahmood Ahmedhas chu sorkar laipui hnuaia agency hrang hrangte an thawhhonaah in-charge atan ruat a ni bawk.

Tang mek chhungte pawhin leiverh bulah hian chanchin an ngaichang reng a. An beiseina a chau tan a, an chhungte chu an ngaihtuah tawh hle.

Doctor-te pawhin awmchilhin ei tur an pek luhte chu an taksa tichak thei tur a ni ngei tih an sawi a, chutih rual chuan an tan rei tawh avangin an rilru lam thlengin a tha lo zawnga nghawng a neih theih thu an sawi.

Tar lan tawh thin angin thawktu mi 40-te hi Pathianni kal ta tuka an hnathawhna leiverh chimin a dante an ni a. Thuneitute chuan anmahni chu an him a, a hmaa tui an lak luhna pipe hmangin ei tur, tui, damdawi leh oxygen pek luh reng an nih thu an sawi.

Lak chhuah tumin a hnawhtu lei tlate chu verh tlang tuma beih ngar ngar a ni a, khawl chak zawk nena an beih pawhin an la su tlang thei lo.

An inruahman dan chuan mm 900-a lian pipe lian rawlh luhna tur verh kuaka chuta tanga vah chhuahtir chu an tum a ni.

Leiverh chim ta hi Char Dham project hnuaia mi niinHindu sakhaw hmun thianghlim - Badrinath, Kedarnath, Gangotri leh Yamunotri te awlsam zawka kal a nih theih nana sorkar laipuiin kawngpui a sial zinga mi a ni.

Uttarkashi district-a leiverh hna hi sorkar laipuiin $ tluklehdingawn 1.5 senna tura kawngpui a sial, Uttarakhand-a sakhaw hmun thianghlim tlawhtute awlsam zawka an zin theihna tura a tih a ni a. Himalaya tlangdunga awm tlangram state-ah hian tlang sang leh vur ramah te Hindu hmun thianghlim ber ber a awm nual a ni.

Km 4.5-a thui leiverh tur hi a fur a thala Hindu biakzinten Himalaya-a an hmun thianghlim pali zinga pakhat, Yamunotri an tlawh theihna tura siam a ni a. He kawng hi a tlang hunah chuan Uttarkashi leh Yamunotri inkar kawng hi a hma aiin km 26 zetin a tawi dawn a ni.

Yamunotri-a temple hi kum tin mi sang tam takin an tlawh ziah a, Himalayan Char Dham Yatra biakzin bul tanna a ni a, Gangotri leh Kedarnath kaltlang zelin temple town Badrinath an thleng thin a ni.

Tang mekte hi India hmar leh khawchhak lam state hrang hrang atanga inhlawh tura kalkhawmte an ni tlangpui.

Thuneitute chuan 15 chu Jharkhand-a mi an ni a, Uttar Pradesh atangin mi pariat, Odisha atangin mi panga, Bihar atangin mi pali, Bengal atangin mi pathum, Assam leh Uttarakhand atangin mi pahnih ve ve leh Himachal Pradesh mi pakhat a nih thu an sawi.