Aizawl: Health Minister Dr.R.Lalthangliana chuan nimin khan Lengpui Airport tlawhin khawsik enna changkang chi, 'Thermal & Optical Bi-Spectrum', Lengpui Airport-a dah tura bun mek chu a endik a. Lengpui Primary Health Centre (PHC) pawh a tlawh nghal bawk a ni.

Health Minister hian Thermal & Optical Bi-Spectrum dahna tur hmun te enfiahin India ramah Delhi, Bangalore leh Thiruvananthapuram Airport te dawtah hetiang khawl dah thei Airport palina kan ni hi thil ropui leh lawmawm tak a ni a ti a. Dr. Thangtea chuan, "Lockdown vangin hun rei tak Airport hi kan hmang tawh lo a, kan hmang leh tan dawn ta a, kan fimkhur hle a ngai a. Heng thil kan leina tur sum mamawhte phal taka min petu kan Chief Minister chungah pawh lawmthu ka sawi nghal a ni," a ti.

Health Minister chuan COVID-19 vei ni a rinhlelhte RT-PCR hmanga swab sample test zung zung a nih theih nan mithiamte nen inrawn tlan a nih hnu ah ZMC a COVID-19 testing laboratory chuan pooled sampling technique a hmang tawh dawn tih sawiin, karleh atangin nitin swab sample 100 vel a bul tan nan test phawt tum a ni tih a sawi bawk.

Health Minister hian Lengpui Airport leh Lengpui PHC ah te hian Mask – 500 ve ve, Gloves – 500 ve ve, Hand Sanitizer Litres 20 ve ve, N95 Mask – 100 ve ve, PPE – 100 ve ve leh Rapid Test Kid -100 ve ve a pe nghal a ni.

India hmarchhak state zingah Mizoram chu Thermal & Optical Bi-spectrum Camera nei hmasa ber a ni a, he Thermal Camera hmang hian meter hnih danah khawsik leh sik loh a entheih a, a rualin mi 10 vawikhatah a endik theih dawn avangin khualzinte tan pawh hun a heh loh mai dawn bakah rang takin he Thermal Camera in a lak data te leh ID te chu email leh whatsapp hmangin COVID-19 lam buaipuitute a thawn zung zung thei nghal tawh dawn a, alo endiktute tan pawh meter hnih dan atanga a nih tawh dawn avangin a him viau tura ngaih a ni.