ZALEN March 16, 2025 : Nikum chhung khan Lengpui Airport-ah khualzin (passenger) lut leh chhuak mi 5,03,509 an awm a. Hetihlai hian airporrt chu Airports Authority of India (AAI) kuta hlan dan dap leh a ni dawn.

Economic Survey 2024-2025-a tarlan a nih danin nikum chhung khan Lengpui Airport-ah khualzin lut (passenger in) mi 2,49,773 an awm a, khualzin chhuak (passenger out) mi 2,53,776 an awm.

Nikum chhung khan thlawhna thlawk chhuak 2,331 awm bawkin tum 2,332 a awm a. Thlawhna hmanga bungraw phurh luh zawng zawng chu kg 4,79,988 niin, bungraw phurh chhuah kg. 91,168 a awm bawk.

Hetihlai hian Chief Minister Lalduhoma chuan Ningani tuka Union Home Minister Amit Shah nena an inbiaknaah Lengpui tumhmun chu AAI kuta hlan dan dap leh ni se tih an sawi dun niin a sawi.

March 13, 2025 assembly budget session-ah he thu hi sawiin, chief minister chuan, Shah hian AAI nena inbiakna thar thawh leh tha a tih thu a sawi niin a sawi a. Hei hi tlawmngai pawlte leh political party dangte pawhin an duh dan a nih thu hrilhin chu lam hawi chu tha a tih ve thu union home minister hi a hrilh tih a sawi a ni.

Hemi chungchangah hian amah leh Shah leh civil aviation minister-te nen sawiho ni se tiin thu an dah thu a sawi a. Union home minister hian theihtawp chhuahpui a inhuam nia a hriat thu sawiin, a chungah pawh lawm thu a sawi niin a sawi.

A lo sawi tawh thin angin sawrkar chuan tumhmun hi Indian Air Force kuta hlan an tum ngawr ngawr lo niin a sawi a. AAI hnena hlan emaw, duhthlan tur dang emaw dap turin an inhawng reng tih a sawi.