ZALEN March 10, 2025; Lengpui Airport Indian Airforce (IAF) kuta hlan turin, Draft Memorandum of Agreement (MoA) working committee in a buatsaih mek a, peihfel a la ni lo.

Vawiin assembly budget session-ah Tuirial bialtu MLA K Laldawngliana zawhna chhangin General Administration Department (GAD) changtu, chief minister ni bawk Lalduhoma chuan, hemi chungchang zirchiang tur hian 'Working Committee to Look Into the Maintenance and Management of Lengpui Airport' chu TBC Lalvenchhunga, MLA & Adviser to the Chief Minister, Mizoram (Finance & Planning) kaihhruaina hnuaiah 18.11.2024 ah din leh a ni tih a sawi a. "IAF hnen a Lengpui Airport hlan chungchang zirchiang leh Draft Memorandum of Agreement buatsaih turin sawrkar-in a din," a ti.

Draft Memorandum of Agreement (MoA) hi working committee in a buatsaih mek tih sawi bawkin, peihfel ala ni loh thu leh cabinet ngaihtuah turin thehluh a la nih loh thu a sawi.

"Working Committee chuan 17.01.2025 khan All NGO, Lengpui nen PL restaurant rest room, Lengpuiah sawihona an nei tawh a. 27.01.2025 khan All NGO, Mizoram nen planning department committee room-ah sawihona an nei leh bawk. Hemi hnu hian chief minister hovin NGO Co-ordination Committee te nen sawi ho leh a ni a. 16th Finance Commission hnenah Airport tih changtlunna tur nawr ho ni se tih a ni," GAD changtu, chief minister chuan a ti bawk.