Aizawl February 4, 2024 : Mizoramin thlawhna tumhmun a neih chhun, Lengpui Airport enkawlna atana sawrkar sum sen thla tin chawhrual chu Rs. 4,01,993 a nih laiin thla tina sum lakluh chawhrual chu Rs. 1,67,89,012.3 a ni thung a. Thla tina sawrkar sum senso aia lakluh a tamna zat hi Rs. 1,63,87,019.3 niin a let eng emaw zatin a tam zawk.

Deputy Controller, GAD Aviation Wing & SPIO-in ZALEN RTI zawhna a chhanna atanga a lan danin Lengpui Airport enkawlna senso leh sum lakluh zat hi nikum July atanga December inkar a ni a, sum sen zatah hian airport thawm thatna hna kal lai mek senso a tel lo.

Mi dang kuta Lengpui Airport hlan chungchangah sawrkar thu an nghak mek tih sawi bawkin airport hi mi dang kut a hlan a nih pawhin mipui/passenger tan harsatna a awm dawn lo niin SPIO chuan a sawi bawk.

Lengpui Airport hi kum 1996-ah siam tan a ni a, December 12,1998-ah hawn a ni a. December 12, 1998 atangin thlawhna a service tan a, tun dinhmunah Alliance Air te kar khatah ni ruk leh Indigo Airlines te kar khatah ni sarih an service mek a. Khualzin thlawhna bakah Indian Airforce thlawhnate an tum thin a. Ram dang thlawhna zingah Myanmar Airforce thlawhna chiah la tumin Myanmar thlawhna hi kumin January 2, 9, 22, 23 leh 24-ah te khan a tum.

January 10, 2024-a Chief Minister Lalduhoma hova Council of Ministers thukhawm chuan mi dang kuta Lengpui Airport hlan chungchang hi an sawiho a. Airport Authority of India (AAI) emaw, private company kutah emaw hlan chungchangah Mizoram tan eng nge tha ber ang tih lo zirchiang turin working group din nise tiin an rel a ni.

Lengpui Airport atanga finance department-in financial year 2023-2024 chhunga sum hmuh tura an bituksak chu Rs. nuai 2,000 a ni a. Lengpuiah hian ni tin khualzin mi 1,500 bawr vel awm ziah ang a ni.

ZALEN thudawn danin tun hnai deuh atang khan mi dang kuta Lengpui Airport hlan chungchang hi buaipui a lo ni tawh thin a. India ram khawpui danga airport enkawltu lian ber, AAI nen pawh indawrna awm tawh thin mah se Mizoram sawrkarin an duh dan thenkhat an pawmpui theih loh avangin inremna hi ziah theih a ni hrih lo niin an sawi.