Robert Lewandowski chuan Paris Saint-Germain sawmna hnawlin Barcelona lama kal turin rilru a siam nghet niin an sawi. Mundo Deportivo sawi danin Lewandowski hian kum thum chhung contract ziakin kar khatah £175,000 a hlawh dawn a, an deal neih hi kum thum chhungin £27million bawr niin an sawi.

He superstar striker hian tun nipui chhung ngeia Bayern Munich chhuahsan a duh thu a lo sawi tawh thin a, Spanish club lian hian an chang dawn ta a nih hmel. Hetihlai hian French champions Paris Saint-Germain lamin Catalan lama a kal tur hi lo hijack an tum a, mahse Lewandowski hian Nou Camp lam a awn deuh zawk niawm tak a ni.

Sum lama harsatna tawk Barcelona hian Lewandowski hi an lei thei ngei dawn em tih erawh a la chiang thei lo thung a, La Liga president Javier Tebas chuan club hi sum lama khuahkhirhna kalpui a nih vangin transfer hi a tih theih lo tur thu a lo sawi ve mek bawk. 

Lewandowski hian kum khat contract a la nei a, a awmzia chu, Bayern lam hian an duh chuan kum khat dang an la kawl rih thei a ni. Kum 33 mi hian a club khelh mekna hi chhuahsan a duh thu a sawi chian tawh avang hian Bayern lam pawh hian chelh luih an tum lem loh a nih hmel. 

International match a khelhnaah Lewandowski chuan,"Bayern lama ka hun hman theih chu a tawp tawh. He club tana khelh zui zel hi a rem tawh lo a ni. Bayern hi club seriou tak an ni a, min kawl luih reng hi ka ring lo, he club-a khelh chhungzawm zel hi ka duh tawh lo bawk. Transfer hi chinfel dan tha ber chu a ni. Min dan luih loh ngei ka beisei," tiin a lo sawi chhuak tawh a ni.  

Bundesliga champion hian Lewandowski thlakna turin Liverpool stiker Sadio Mane chu lakluh tumin an bei ve mek bawk.