Aizawl: Zirtawp zan khan Mizoram khawchhak lamah lir a nghing leh a, mipui an thla-barin khawlaia riahbuk ah mi tam tak an riak.

Zalen thudawn danin lir hi tum 4 vel a nghing a, zan dar 10 pelh hreta a nghing chu a na deuh bik a. Lirnghing hian thil tihchhiat lian tham a nei lo a, mahse hmun thenkhatah chuan a hmaa lei leh in khi sa te chu a zauh belh a, mipui an thlabarin khawlaiah an tei suau suau niin Khawbung YMA hruaitute chuan an sawi. Lir nghing laka mipui te him nan leh an riah nan khaw tam tak chuan buk an siam a, heng buk leh motor ah te mi tam tak chu an riak a. YMA leh disaster committee ten solar light te semin mipui thlabar te an thlamuan bawk.

Khawbung YMA hruaitute chuan lir nghing vang hian chhiatna lian thleng lo mahse mipui an thlabar nasa a, hlauh vanga tap te, khawng leh thawhah te an awm a. Heng mite hi damdawi in panpui an niin nimin lam chuan chhuah tir leh an ni tawh niin Zalen an hrilh. YMA hruaitute chuan street light a awm loh avangin zana lir a nghin chuan an buaina a ti zual tih sawiin eng chu nei se chuan mipui hlau thlabar pawh a nep theih zawk an beisei tih an sawi bawk.

Nimin khan Champhai DC office atangin Officer te insemdarhin lir nghing tuar te an thlamuan a, vawiin hian Sports & Youth Services Minister Robert Romawia Royte, bialtu MLA Ramthanmawia leh mi pawimawh dang ten lir nghinna hmun hi an pan dawn a. Naktuk hian MZU mithiam ten thil awmdan zirchiang turin khawchhak lamah hian chhoh an tum bawk.