DOWNLOAD OUR APP

Read latest news on your phone
app-store

Lirnghing na takin Japan a sawiah mi pahnih thi

Mar 17, 2022

Kum 2011-a Japan chanchina lirnghing na ber, mi 18,000 chuang an thih phahna intanna hmun bul lawka Nilaini zana lirnghing lehah mi pahnih an thi a, chhungkaw maktaduai hnih chuangin power supply neih loh phahin chhiatna tenau a thleng nual a. Kum 11 liam taa nuclear plant chhiat phahna ang em erawh tun dinhmunah a la thleng lo nia hriat a ni.

Japan hmarchhak lam chu Nilaini zan khan lirnghing na takin a sawi a, hriat theih chinah mi pahnih thiin chhawngkaw maktaduai hnih chuangin power supply an neih loh phah.

Magnitude 7.3-a na lirnghingin a sawina lai hi kum 11 liam taa lirnghing na tak a thlenna bawr tho, Fukushima nuclear disaster a thlenna vel tho kha a ni.

Thuneitute chuan mi 90 velin hliam an tuar bawk niin an sawi.

A nat zualna lai thenkhatah chuan mihring tan din ngaihna awm lo khawpin a sawi na a, Tokyo khawpuiah pawh in sangte chu a sawi lawk lawk niin AFP news agency chuan a tar lang.

Lirnghing hi an ram sanaa zan dar 11:36 (India-a zan dar 8:06) niin lei hnuai km 57-a thuk atanga intan niin Japanese thuneitute chuan an sawi.

Fukushima, Miyagi leh Yamagata prefecture-ah chuan sawi nawn leh (aftershock) thleng thei reng a ni tih an sawi bawk.

A nghin hnu lawkah hian Japan-a meteorological agency chuan metre khata sang tui fawn keng tsunami chu hmarchhak lam vaukamah a thlen phah thei tih sawiin inralrinna an khawng ri nghal a; mahse, Japanese broadcaster NHK chuan he inralrinna hi hnuh kir leh tawh a ni tih a puang.

Electric pe chhuaktute chuan Tokyo-a chhungkaw 7,00,000 chuang leh hmarchhak lama in 1,56,000 chuangin power an neih loh nghal thu an sawi a; mahse, a hnu lawkah in thenkhatah hian an pe chhuak zui leh nghal tih an sawi.

Hmarchhak lam hmun eng emaw zatah chuan hmun sang atanga thil tla leh thlawkin mi a hliam nual a. Fukushima Prefecture-a Soma khawpuiah chuan putar kum 60 vel mi chu hetiang thil tlain a delh avangin a thi a. Miyagi Prefecture-ah mi dang pakhat a thi bawk.

Fukushima khawpui hmar lama rel tlan chak chi (bullet train) chu lirnghing avang hian a kawng a zawh sual niin operator-te chuan an sawi a. Thi leh hliam erawh an awm lo hlauh.

Japanese Prime Minister Fumio Kishida chuan sorkarin chhiatna thlen dan kimchang hi a dap khawm mek tih thuthar lakhawmtute hnenah a sawi a; thuneitute leh emergency service-in call an dawn zat an la hriat theih loh a sawi.

Ishinomaki khawpuia thuneitu pakhat chuan a mu tui lai chu ‘nasa taka insawiin a tihharh’ thu AFP a hrilh a. “Lei chhunga ri hum hum thawm ni maiin ka hria a, hlauhna ai mahin Great East Japan earthquake kha min hriat chhuahtir a ni,” tiin kum 2011-a lirnghing chungchang a sawi.

Tun tuma lirnghinna hi Fukushima vaukam atanga km 60 vel chauhva hla a ni a. Japan ram chanchina lirnghing na ber, kum 11 liam taa mi 18,000 zet thi an awm phahna intanna atanga hla lo tê a ni.

Kum 2011 lirnghing khan tsunami thlenin Fukushima nuclear plant pawh a tichhia a, nasa taka radiation putin chhiatna pawh a thlen hnem hle.

Nuclear lama thuneitute chuan Nilaini zana lir a nghin hnuah hian nuclear plant-ah hian thil pangngai lo hmuh leh hriat an neih loh thu an la sawi rih.

Share now