Aizawl: Champhai District Bawrhsap Maria C.T Zuali chuan nimin khan kar kal ta atanga lirnghingin Khawbung RD Block huam chhunga chhung-kaw engemaw zat chenna in a tihchhiat zinga Khawbung, Khuangthing leh Zawlseia chhungkaw 26 te chu tlawhin, Disaster Management & Rehabilitation atangin chhawmdawlna tur a hlan.

Hlanna inkhawmah hian Champhai District Bawrhsap chuan lirnghing tuarte chu thinlung taka a tawrhpui thu sawiin, sawrkarin an chinchang a ngaihven reng thu leh in leh lo chhia tanpuina leh chhawmdawlna chu a siamthatna khawp tling lo mah se, sawrkar-in a tawrhpuizia lantirna leh inkaihhruaina awmsa zul-zuia siam a nih thu a sawi a ni.

Khuangthing khuaah hian chenna in chhe zual chhungkaw 9 awmin a chhe nep deuh chhungkaw 9 an awm bawk a, Zawlseiah a chhe zual chhungkaw 3 awmin a chhe nêp deuh chhungkaw 5 an awm bawk a ni. A chhe nasa zual hnenah Rs 15,000/- hlan niin, a chhe nêp deuhah Rs 5200/- hlan an ni thung.

Champhai District Bawrhsap chuan Khuang-thing khuaa Lalliansanga in bang chim lek lek chu chhiatna dang thlen mai thei anih avangin thiat turin thu a pe a. Khawbung Saron Venga Thangphunga te in concrete ban 8 khi chat kual vek chu a hmunah enpui bawkin, Khawbung Village Level Disaster Committee te nen Zawlbuk-ah inkawmhona hun an nei bawk a ni.

Champhai District Bawrhsap hi SDO Sadar Lalnunfela Chawngthu, Khawbung BDO Dr. Manesia Khaimeichho leh DLAO Benjamin Zalawma Ralte te chuan an tawiawm a ni.