ZALEN August 9, 2025 : Lirtheia Eizawng Pawl hrang hrang Inzawm khawm Joint Committee chuan August 4-9, 2025 chhunga TLAN CHAWLH an puan chu pawl hrang hrang leh Mizoram Mipuiten tha taka an zawm sak avang leh an support na avangin lawmthu an sawi a. August 9, 2025 tlai dar 4:00 atang khan tlan chawlh hi an titawp tih an puang.

Joint Committee chuan Kolasib leh Vairengte inkar kawng hi kawng a chhiain Lirthei bungraw phur tan a tluk hlauhawm tak tak a la awm a, heng kawng chhe zual lai te hi NHIDCL-in chak zawk a a siam that theih nan a hma la lehzual turin Mizoram Sawrkar pawh an phut a. Lirthei a eizawng pawl ten nawr zui ngai kher lova hma la vat vat turin an phut bawk a ni.

Fur chhunga helai kawng enkawl leh zelna turah heng te hi Sawrkarin hriatsak se an duh a:

1) Kawng hnawh nan a lung sawrkarin a lei te a hmunah Receive tu mumal tak awm in, Lung chhia ni a hmuh mai theih ang te phei chu hnawl ngam turin an duh.

2) Kawng chhe lai leh Kawng tha lai hmun thenkhata tuihawk luankawr mumal lo te kawng a tlo zawk theih nan mumal leh tha tak a vil zui reng turin an ngen a ni.

3) Kawng chhe zual lai a chirh leh lung inpawlh nuaih te kawng a tlo zawk theih nan lung hlang chauh a hnawh khah ni se tha an ti.

4) Side drain haina vung te hmun dang a paih lova kawngsir a chhawp zel a ni hian kawng a ti tlo lovin tuitling a siam a, kawngin a tlo loh phah avangin heng kawngsir a leivung leh chirh chhek te hi hmun dangah paih ni se tha an ti bawk.