Aizawl February 18, 2024 : Nikum chhung khan Aizawl khawpui chhungah lirthei dan bawhchhia 14,683 man an awm a, an pawisa chawi tling khawm Rs. 1,05,46,412 a tling a. Lirthei dan bawhchhiatna thleng zingah lirthei hun/dah phal lohnaa dah (parking violation) a tam ber.

Aizawl traffic police hotute hnen atanga ZALEN thudawn danin, nikum chhunga lirthei dan bawhchhia an man tam ber chu two wheeler niin 10,274 a tling a, LMV 3,198 man bawkin, taxi 663 man an awm bawk a, hengte hi dan bawhchhia man tam zualte an ni.

Dan bawhchhiatna hrang hrang zingah phal lohna hmuna lirthei dah chu dan bawhchhiatna tam ber niin 2,581 man an awm a, no entry 1,165 man awm bawkin wrong side traffic 965 man an awm.

No turning 925 man awm bawkin obstruct traffic flow 612, without helmet 461, disobey signal/order 416, without driving license 299 leh drunken driving 77 man an awm bawk.

Kum 2023 chhung khan road safety/traffic rules awareness campaign college, school, NGO, driver community, kohhran leh hmun dangah vawi 14 neih a ni a, awareness campaign-a tel zawng zawng 3,571 an tling.

Aizawl Traffic : Dan bawhchhia

Kum   Man zat   Chawi zat

2020   11,092   Rs. 43,82,250

2021   10,027   Rs. 34,03,100

2022   18,359   Rs. 82,61,600

2023   14,683   Rs. 1,05,46,412