Traffic coordination committee chuan Aizawl khawpuiin a zawh loh lirthei a kawl avangin lirthei tlan vel tih thawl nan tun thla atang hian mi mal lirthei chu intlanchhawk turin a rel a. Motor registration number tawp berna ang zelin lirtheite chuan thla khatah tlan loh ni a inchhawkin an nei zel dawn a. Hei hian mi tlemte chauh a huam lo va, minister leh sawrkar department hotute pawh intlan chhawktir tur an ni dawn a ni. Lirthei intlanchhawk hian ke hnih nei two wheeler te pawh a huam a, two wheeler pung chak lutuk hian lirthei chetvelna a titawt zual niin ngaihdan a awm bawk a ni. Kan khawpui hi a tir atangin mumal taka plan a ni lem lo va, hun rei tak chhung chu khawpui bik pawh enkawltu awm lovin kan awm hman a nih kha. Kawngpui pakhatin chhim leh hmar a hawl chhuak tawpa, chumiah chuan mi tam zawk chu kan inchhung khawm lo thei lo va, tlanna tur dang a awm miau loh avangin han in dem ngawt pawh thil theih a ni chiah lo. Lirthei mamawh nia inhriattna a lian tual tual a, ni tinin ke hnih leh ke li nei chi kan kawngah a pung lo thei lo bawk a, infuih a theih a, inkhap bur erawh thil theih ziazang a ni bik si lo. Khawpui chhunga kawngpui tur zuah chungchangah pawh dan awmsa awm mahsela inhriatthiamna thui tak kan neih zel avangin kawngpui zuah tur ang pawh a tir atangin tih mumal a ni lo va, thenawmten an zuah zat chu in sa tharten an zuah zat a ni deuh meuh a. A zuah tlem thlerin kawng an nei chep deuha, chu aia la zuah tlem leh chhawng phei chuan an nei zim lehzual a ni deuh ber mai. Hetiang hi kan kalphung nghet tak mai a nih avangin kan khawpui pawh a len loh ang huin a tawt ta em em a. Tihfuh loh ni phei chuan lirtheia inhawl chhuah aiin kea kal a hlawk zawk em? tiin an inchhut ta fo hlawm a nih hi. Tuna kan kawng awm dan en hi chuan tih theih a tam lo hle mai a, kawngpui inkian zawnga hmalak a nih ngawt loh chuan hmalak dan tur a vang hle a ni. Hemi bakah hian lirthei khalh chhuaktute hian mi dang ngaihchan an thiam tur a ni a kawng inchuhna nasa lutuk hian tul lovah traffic che vel a tibuai fo thei a, thiam chiang lo phei chuan ke hnih a ni emaw ke pali a ni emaw lirthei hi hawl chhuah loh tawp nise a tha khawp ang. Taxi intlanchhawk a nih khan a tirah chuan duh lohna a lian viau a, a neitute pawhin inhnek rem dan an zir nasain a lang khawp a. Tuna mi mal lirthei intlan chhawk tur pawh hi enchinna a nih angin han zawm tlang phawt ila a tha mai awmin a lang. Chutih rualin thil pakhat lang chiang reng chu intlanchhawk hi hlawhtling pawh ni khawpui lian zawk tam taka an lo tih tawh a rei hnua an hlawh chhampui fo a ni a, mihring kan pung zela, lithei pawh a pung zel dawn a, hmathlir thui tak neih ngam a hun ta hle mai. Hetia inhrem reng lo hian khawpui thar plan fel zawkte neiin rilruah awm tan tawh sela a hun tawh lo maw?