Aizawl : Aizawl Traffic Police te chuan lockdown pawh sei a nih leh hnu, a bik takin tunkar chho atanga khan lirthei chhuak vak phalna nei lo an tam thu an sawi a, engemaw zat an haw tir thin thu an sawi.

Traffic SP Rodingliana Chawngthu chuan lockdown kal pui hmasak lai, April 14 hmalam kha chuan chhuak vak an tam lem loh thu leh man pawh an nei ngai meuh lo a, pawisa chawi tir pawh an awm ngai lo tih a sawi a, mahse, tun hnaiah erawh man tur an awm reng tih a sawi langin tunkar chhunga permit nei lo vakchhuak, an haw tir ringawt pawh 500 vel an nih thu a sawi.

Traffic lam hian lirthei khalhtu dan bawhchhia pawh man tur an awm reng thu an sawi a, kar hmasa lama phei kha chuan nikhata pawisa an chawitir pawh cheng 9,000 chuang a tling hial. Dawrpui bawr bikah motor dah dan zawm lo an tam thin avangin traffic lamah buaina a awm phah thin tiin, dawra thil lei ten social distancing an zawm that loh avangin inhauh a ngai phah fo tih an sawi bawk.